Presidenti i Shteteve të Bashkuara, Donald Trump, bëri të ditur të hënën se është arritur një marrëveshje me Kinën për të siguruar funksionimin e TikTok në territorin amerikan. Ky zhvillim shënon përmbylljen e një procesi negociatash që ka zgjatur më shumë se një vit, i nisur që gjatë mandatit të tij të parë.
“Takimi i madh tregtar në Evropë midis Shteteve të Bashkuara të Amerikës dhe Kinës ka shkuar shumë mirë! Do të përfundojë së shpejti”, shkroi Trump në një postim në platformën e tij Truth Social.
“U arrit gjithashtu një marrëveshje për një kompani të ‘caktuar’ që të rinjtë në vendin tonë donin shumë ta shpëtonin. Ata do të jenë shumë të lumtur! Do të flas me Presidentin Xi të premten.”
Diplomatët e dy vendeve u takuan këtë javë në Madrid për të diskutuar tregtinë dhe çështje të tjera, ndërsa sekretari i Thesarit, Scott Bessent, konfirmoi se çështja e TikTok ishte në rendin e ditës.
Trump ka shtyrë disa herë afatin e vendosur prej tij për të arritur një marrëveshje mbi të ardhmen e TikTok në SHBA, duke kërkuar që të paktën një pjesë e biznesit amerikan i kompanisë të kalojë nën pronësi të mbështetur nga investitorë amerikanë.
Çështja mori dimension ligjor pas miratimit të një projektligji dypartiak nga Kongresi, i cili u firmos nga ish-presidenti Joe Biden. Ligji parashikonte ndalimin e TikTok në SHBA, përveçse në rastin kur kompania kineze do të hiqte dorë nga aksionet e saj në asetet amerikane të rrjetit social.
j.l./ dita
