Presidenti i Shteteve të Bashkuara, Donald Trump, ka zhvilluar takime të ndara me presidentin e Ukrainës, Volodymyr Zelensky dhe kryeministrin izraelit, Benjamin Netanyahu, të cilat Shtëpia e Bardhë i përshkroi si “pozitive dhe produktive”, raporton BBC.
Dy liderët ndodheshin në Uashington për të marrë pjesë në ceremoninë mortore të senatorit Lindsey Graham, një mbështetës i vendosur i Izraelit dhe një prej zërave më të fortë në favor të ndihmës amerikane për Ukrainën. Graham ndërroi jetë në fillim të këtij muaji.
Gjatë takimit me Trumpin, Zelensky diskutoi nevojën për forcimin e mbrojtjes ajrore të Ukrainës, ndërsa Kievi shpreson që SHBA-ja të vijojë mbështetjen ushtarake në përballjen me sulmet ruse.
Sipas raportimeve, presidenti ukrainas pritej t’i kërkonte Trumpit të zbatonte premtimin e bërë gjatë samitit të NATO-s këtë muaj, për t’i dhënë Ukrainës licencën për prodhimin e raketave interceptuese Patriot.
Ukraina ka kërkuar prej kohësh raketat amerikane Patriot, të cilat, sipas autoriteteve në Kiev, janë thelbësore për mbrojtjen e qyteteve nga sulmet gjithnjë e më intensive me dronë dhe raketa balistike të Rusisë.
Nga ana tjetër, kryeministri izraelit Benjamin Netanyahu zhvilloi takimin me presidentin amerikan në një periudhë kur marrëdhëniet mes SHBA-së dhe Izraelit janë përballur me tensione për shkak të qëndrimeve të ndryshme lidhur me Iranin.
Pas përfundimit të bisedimeve me Zelenskyn, Trump publikoi një mesazh të shkurtër në rrjetin e tij social Truth Social, ku shkroi: “Takimi shkoi shumë mirë!”
j.l./ dita
