Policia e Tiranës dhe SPAK kanë sekuestruar pasuri të paluajtshme me vlerë 1,2 milionë euro, në pronësi të një 42-vjeçari, që dyshohet të jenë përftuar përmes mashtrimit në bursa.
Në vijim të punës gjurmuese dhe hetimore, për konstatimin dhe sekuestrimin e pasurive që rrjedhin nga veprimtaritë kriminale, u finalizua operacioni i koduar “Fraud”, në kuadër të të cilit u ekzekutua vendimi i GjKKO-së, për sekuestrimin e 4 pasurive të shtetasit E. K., 42 vjeç, banues në Tiranë.
Konkretisht, u vendos sekuestro mbi 1 apartament, 2 vendparkime për automjete dhe 1 subjekt tregtar, pasuri të cilat dyshohet se rrjedhin nga veprimtaria kriminale e 42-vjeçarit, në fushën e mashtrimit kompjuterik, në bursa.
Materialet procedurale iu referuan SPAK-ut, për veprime të mëtejshme.
Në korrik të vitit të kaluar, Kasmi u dënua me 11 vite burg nga Gjykata e Posaçme, i shpallur fajtor për krijimin e një grupi të strukturuar kriminal, i cili përmes mashtrimit me bursa fiktive, kishte arritur t’u merrte miliona euro shtetasve europianë. Përveç Kasmit, u dënuan edhe 12 shtetas të tjerë.
Sipas hetimeve rezultoi se nga mashtrimi i qindra shtetasve në BE i është shkaktuar një dëm prej 7 milion eurosh. Hetimet nisën që në 2021, ku shtetas gjermanë, francezë, italianë, spanjollë dhe grekë ftoheshin nga agjentët, që të investonin në bursa ndërkombëtare, duke bërë depozitimin e parave sipas udhëzimeve të tyre, në platformat mashtruese.
Këto depozita nga viktimat bëheshin në llogari të cilat kanë rezultuar se gjenden në banka të vendeve të ndryshme si në Bullgari, Lituani, Poloni, Qipro, ku më pas zhdukeshin nëpërmjet transfertave të njëpasnjëshme ose konvertimit në kriptovalutë. Nga hetimet u provua se një pjesë e parave të depozitave të viktimave kanë përfunduar në llogaritë e të pandehurve në Shqipëri. Bashkë me Erjon Kasmin u dënuan dhe 12 persona të tjerë.
j.l./ dita
