U dhunua nga 47-vjeçari se nuk pranoi t’i shiste birra, i moshuari ndërron jetë në spital

Ka ndërruar jetë në spital, 80-vjeçari Namik Rustemi, i cili bashkë me bashkëshorten e tij, u dhunuan nga 47-vjeçari, Ilir Nukaj.

Namik Rustemi nuk mundi t’i mbijetonte dot plagëve dhe që nga fundjava e kaluar ishte në intubim.

Ai kishte marrë goditje grushtash e shkelmash në kokë dhe trup. Edhe bashkëshortja e tij 77-vjeçare mori lëndime, por pa rrezik jete.

Sipas raportimeve, Nukaj është paraqitur në dyqanin e të moshuarve për të blerë alkool, ndërsa 80-vjeçari nuk ka pranuar t’ia shesë, pasi njihej si person problematik.

Më pas Nukaj i ka goditur dy të moshuarit Namik Rustemin dhe bashkëshorten e tij 77 vjeç, me grushte në pjesën e kokës.

Autori u arrestua menjëherë pas krimit dhe ai ndodhet në paraburgim, me masën arrest me burg. Nukaj, person me preçedent penal për krime ndaj personit, akuzohet për veprën penale ‘‘Plagosje e rëndë me dashje’’.

j.l./ dita