Udhëheqësi suprem i Iranit ka denoncuar një propozim të Shteteve të Bashkuara që synon të frenojë përpjekjet bërthamore të Teheranit dhe kërkoi që vendi i tij të ruajë pavarësinë, mes raporteve se Uashingtoni po ofron të përfshihet në programin bërthamor të Teheranit.
“Fjala e parë e SHBA-së është se Irani nuk duhet të ketë një industri bërthamore dhe duhet të mbështetet te Shtetet e Bashkuara. Përgjigja jonë ndaj absurditetit të SHBA-së është e qartë: ata nuk mund të bëjnë asgjë në këtë çështje”, tha Ajatollah Ali Khamenei.
Presidenti i SHBA-së, Donald Trump, tha të hënën, në dukje në kundërshtim me atë që iu propozua Iranit, se marrëveshja nuk do të lejojë pasurimin e uraniumit.
Irani dhe SHBA-të përfunduan një raund të pestë bisedimesh bërthamore me rreziqe të larta në Romë më 23 maj, mes skepticizmit në rritje në Teheran në lidhje me shanset për një marrëveshje. Pas atij raundi diskutimesh, të dyja palët “ranë dakord të takohen përsëri në të ardhmen e afërt”, tha në atë kohë një zyrtar i lartë i administratës amerikane.
i.b./dita
