UEFA ka bërë të ditur se ka pranuar 30 milionë kërkesa për bileta për ndeshjet e Kampionatit Evropian “Euro 2024”.
UEFA vlerësoi se “numri i lartë i kërkesave për bileta në fazën e dedikuar të shitjes për tifozët e ekipeve pjesëmarrëse nënvizon një interes të madh për turneun final të shumëpritur në Gjermani”.
“Euro 2024” do të nisë më 14 qershor dhe do të mbyllet me finalen e madhe, më 14 korrik 2024. Faza e aplikimit për bileta kushtuar mbështetësve të ekipeve kombëtare pjesëmarrëse u mbyll sot dhe tifozët treguan një interesim të madh për të qenë pjesë e finaleve të Evropianit.
Çdo Federatë e Kombëtareve pjesëmarrëse mori 10,000 bileta për tifozët e tyre për çdo ndeshje dhe disa Federata kanë shitur me sukses të gjitha biletat te tifozët e tyre. Biletat e mbetura do të ndahen si pjesë e shortit të zhvilluar nga UEFA.
UEFA njoftoi se në total janë kërkuar mbi 30 milionë bileta nga 206 vende të ndryshme, gjatë periudhës prej 2 deri më 12 dhjetor. Krahasuar me fazën e parë të aplikimit për publikun e gjerë, në të cilën 35% e biletave u kërkuan nga tifozët jashtë Gjermanisë, gjatë kësaj faze numri i aplikimeve u rrit në 59%.
p.c. / dita
