Arbitri më kontrovers në Spanjë, por edhe në arenën e kompeticioneve europiane e botërore, nuk do i fryjë më bilbilit në fushë, të acarojë lojtarë dhe teknikë apo dhe të regjistrojë rekorde kartonësh (deri tani me rekordin e 20 kartonëve në një ndeshje). Pas 15 vitesh, Antonio Mateu Lahoz, i thirrur edhe ‘Toño’ për miqtë, do të pushojë së qeni gjyqtar i Kategorisë së Parë (La Liga në Spanjë), në fund të këtij sezoni. Por 46-vjeçari do vijojë të jetë aktiv kryesisht në sallën e VAR-it dhe që valencianit s’i pëlqen, sepse do që të jetë ende protagonist në fushë. E njëjta gjë do të ndodhë edhe me Carlos Del Cerro Grande (47), megjithëse nuancat janë shumë të ndryshme. Lahoz është arbitri të cilin gjatë Botërorit argjentinasi Lionel Messi (kampion bote tashmë) e sulmoi ashpër, për shkak të gjykimit në ndeshjen çerekfinale me Holandën, ku u dhanë 17 kartona të verdhë dhe pati një përfundim gati dramatik. Gjithashtu njihet si gjyqtari që nxirrte më shpesh kartonët e kuq, por edhe për kampionatin që i hoqi Barcelonës në vitin 2014 në Camp Nou, në ndeshjen me Atletiko Madrid, duke i anuluar një gol të rregullt Messit, që mund t’i shpallte kampionë, teksa titulli shkoi tek miqtë nga kryeqyteti atë ndeshje (përfundoi 1-1, java e fundit e La Liga). Lahoz do mbahet mend si arbitri i çudirave, me vendime të paqarta dhe ndikim në rezultatet e ndeshjeve.
Kerko
