Kryetari i Bashkisë Tiranë ka bërë me dije se ngushtica pranë liqenit, e njohur si ‘Triangolo’, po shndërrohet në një rrethrrotullim me korsi të plota, ndriçim dhe sinjalistikën e duhur, për t’i dhënë fund trafikut në këtë zonë të Tiranës.
Gjatë një inspektimi në orët e vona të natës, kryetari i Bashkisë së Tiranës, Erion Veliaj tha se kështu i jepet zgjidhje një tjetër nyjeje problematike, që çliron qarkullimin në zonën e liqenit.
Nga i njëjti vend, Veliaj dha lajmin se në këtë zonë të re do të ndërtohet Teatri i ri i Kukullave, si dhe Biblioteka e re Kombëtare, e cila prej vitesh vuan mungesën e hapësirës.
“Doja të përshëndesja kolegët, të cilët po punojnë në mesnatë për një projekt të rëndësishëm, që zgjidh një nga nyjet më problematike të Tiranës. Në zhargon zona njihet si ‘Triangolo’, por të hënën do të kthehet në një rrethrrotullim të madh, me më shumë hapësirë.
Qytetarët do të ecin lirshëm në trotuare, jo si në ato shtigjet e dhive, që kishim më përpara; ecet lirshëm me makinë në një rrethrrotullim me dy korsi, kurse më parë mezi gjendej e drejta e kalimit te kthesa që të çonte në drejtim të Gardës.
Kjo sjell një shfryrje të trafikut për gjithë zonën e Digës, që ka qenë një ndër zonat më problematike të Tiranës.
Dua të sqaroj disa gjëra shumë të rëndësishme, për të cilat ka shumë spekulime, si për çdo punë që bën Bashkia e Tiranës, përfshirë edhe zonën e Gardës. Gjysma e hapësirës së Gardës i është dhënë Bashkisë, një pjesë për këtë projekt, një pjesë për t’iu bashkuar Parkut të Liqenit.
Në gjysmën tjetër do të ndërtohet Teatri i madh i Fëmijëve; pra, largohemi nga ndërtesa në qendër të Tiranës për të pasur një teatër modern, në një projekt fantastik që qeveria do e zbatojë në pjesën e Gardës që kemi fituar nga kjo ndarje e pronës. Pjesa tjetër do të jetë për Bibliotekën e re Kombëtare, e cila sot ndodhet në atë skutën e vogël te Pallati i Kulturës.
Këtu do të vijë Biblioteka Kombëtare, që ikën nga Pallati i Kulturës, dhe Teatri i Kukullave, që ikën nga ajo ndërtesë, që në fakt s’ka qenë Teatri i Kukullave, por Parlamenti i parë në Tiranë”, deklaroi ai.
Një vit më parë u hartua masterplani që do të përfshijë Bibliotekën Kombëtare dhe Qendrën Kombëtare të Kulturës. Plani i publikuar nga Ministria e Kulturës tregonte transformimin e hapësirës territoriale të “Gardës së Shqipërisë” nga një hapësirë ekskluzivisht institucionale, në një hapësirë përfshirëse për publikun.
Qendra Kombëtare të Kulturës për Fëmijë do të shtrihet në një hapësirë prej 4800 m2 dhe do të ketë salla ekspozimi, teatër kukullash, hapësira mësimi dhe rekreacioni, mjedise publike në funksion të aktiviteteve kulturore.
j.l./ dita
