Zbardhet vendimi i qeverisë, i miratuar një ditë më pare me shtesat që do të përfitojnë të gjithë punonjësit e Agjencisë së Mbikëqyrjes Policore në rastet e punësimit apo transferimit të tyre larg vendbanimit, si dhe shpërblimet për rezultatet e larta të arritura në punë. Sipas vendimit të miratuar një ditë më parë shtesat 10-30 mijë lekë (në varësi të distancës në kilometra).
Kështu, çdo punonjës i Agjencisë i emëruar në detyrë, i cili me urdhër të drejtorit të Përgjithshëm transferohet ose emërohet, në përputhje me funksionin që mban, brenda strukturave qendrore dhe vendore të Agjencisë, përfiton pagesë për kompensimin e shpenzimeve të udhëtimit, si më poshtë vijon:
- Nga 36 km deri 60 km, në masën 10 000 lekë/muaj
- Nga 61 km deri 100 km, në masën 15 000 lekë/muaj
- Nga 101 km deri 150 km, në masën 20 000 lekë/muaj
- Nga 151 km deri 200 km, në masën 25 000 lekë/muaj
- Mbi 200 km, pagesa do jetë në masën 30 000 lekë/muaj.
Përfitimi i kësaj pagese vazhdon deri në ndryshimin e vendbanimit të punonjësit të Agjencisë, që nënkupton sistemimin me banesë në territorin që përkon me juridiksionin e njësisë strukturore të Agjencisë së Mbikëqyrjes Policore, ku punonjësi është caktuar.
Për përfitimin e kësaj shtese, punonjësi i Agjencisë së Mbikëqyrjes Policore paraqet në strukturën përgjegjëse të burimeve njerëzore dokumentacionin e poshtëshënuar:
- Kërkesë me shkrim, ku është i punësuar si punonjës i Agjencisë
- Fotokopje të kartës së identitetit, certifikatën e gjendjes familjare
- Vërtetim nga organi i qeverisjes vendore, ku të vërtetohet vendbanimi i familjes dhe i vetë punonjësit të Agjencisë, pavarësisht nga gjendja civile
- Vërtetim pranë drejtorive vendore të Agjencisë Shtetërore të Kadastrës, nëse punonjësi i agjencisë ka banesë në juridiksionin ku është transferuar
- Vërtetim pranë drejtorive vendore të Agjencisë Shtetërore të Kadastrës, nëse punonjësi i Agjencisë ka aplikuar për legalizim banese në juridiksionin ku është transferuar.
Kur punonjësi i Agjencisë transferohet ose emërohet në detyrë në punë jashtë vendbanimit të tij, dhe për këtë shkak, bashkëshorti ndërpret marrëdhëniet e punës, bashkëshorti ka të drejtë të përfitojë një pagë mujore në rast se nuk mund të punësohet në vendin e transferimit ose emërimit në punonjësit të Agjencisë. Paga mujore përfitohet deri në datën e punësimit të bashkëshortit, por jo më shumë se 15 vite. Paga mujore është në masën 100 % të pagës mesatare mujore të vitit të fundit të punës, por, në çdo rast, jo më shumë se 150 % të pagës minimale në shkallë vendi, të miratuar me vendim të Këshillit të Ministrave.
Për përfitimin e pagesës, sipas pikës 3, të këtij vendimi, punonjësi paraqet në Agjencinë e Mbikëqyrjes Policore dokumentacionin e poshtëshënuar: Kërkesë me shkrim, me gjenealitetet e plota, drejtuar strukturës përgjegjëse të burimeve njerëzore, në të cilën përcaktohen: Urdhri, data, adresa e banimit dhe arsyeja e transferimit
Për hartimin dhe miratimin e procedurës, njësia përgjegjëse e burimeve njerëzore kërkon nga punonjësi dokumentacionin, si më poshtë vijon:
- Vërtetim të pagës mesatare mujore të vitit të fundit kalendarik të punës për pagesën e marrë nga bashkëshortja/bashkëshorti;
- Vërtetim nga sigurimet shoqërore për kontributet e derdhura nga bashkëshorti / bashkëshortja për periudhën e punësimit;
- Librezën e punës së bashkëshortes/it, ku të jetë cilësuar largimi nga puna për arsye të transferimit të bashkëshortes/it;
- Vërtetim nga zyra përkatëse e punësimit, ku të vërtetohet se bashkëshortja/i është regjistruar si punëkërkues i papunë dhe nuk i është ofruar punë në profesionin e saj/tij. Këtë vërtetim punonjësi e paraqet çdo 3 (tre) muaj në njësinë përgjegjëse të burimeve njerëzore;
- Kontratën e qirasë së banesës ku punonjësi është i transferuar;
- Fotokopje të kartës së identitetit, certifikatën e gjendjes civile familjare;
- Vërtetim nga njësia administrative/bashkiake/bashkia, ku të vërtetohet vendbanimi i familjes dhe i vetë punonjësit të Agjencisë, pavarësisht nga gjendja civile.
Vjetërsia në punë e bashkëshortes/it konsiderohet vjetërsia e përgjithshme në punë, për të cilën janë paguar kontributet e sigurimeve shoqërore, e pasqyruar në dokumentacion sipas procedurave për regjistrimin dhe evidentimin e kontributeve, me përjashtim të viteve të sigurimit vullnetar, vetëpunësimit, shërbimit ushtarak për meshkujt, viteve të shkollimit në institucionet e arsimit të lartë dhe periudhave të trajtimit me pagesë papunësie.
Koha e qëndrimit pa punë e bashkëshortes/it të punonjësit të Agjencisë llogaritet në vjetërsinë e përgjithshme të punës, për efekt përfitimi pensioni pleqërie, invaliditeti e familjar, sipas ligjit nr.7703, datë 11.5.1993, “Për sigurimet shoqërore në Republikën e Shqipërisë”, të ndryshuar. Kontributi në degën e sigurimeve të pensioneve derdhet nga institucioni, sipas legjislacionit në fuqi për sigurimet shoqërore mbi bazën e pagesës së përcaktuar në pikën 3, të këtij vendimi.
Punonjësi i Agjencisë për rezultate të larta në punë, gjatë kryerjes së detyrave e shërbimeve të veçanta në realizimin e veprimtarive të Agjencisë, si dhe në luftën kundër korrupsionit dhe shkeljeve të tjera të ligjit, përfiton shpërblim deri në 6 (gjashtë) paga mujore në vit. Ky shpërblim përballohet nga fondi i pagave të Agjencisë së Mbikëqyrjes Policore dhe mund të jepet përgjatë të gjithë vitit kalendarik.
Për përfitimin e pagesës si shpërblim drejtori i drejtorisë qendrore apo rajonale në Agjenci paraqet në strukturën përgjegjëse të burimeve njerëzore, në Agjencinë e Mbikëqyrjes Policore, propozimin për shpërblim për punonjësin, duke e shoqëruar me relacionin për rezultatet konkrete të arritura. Pas shqyrtimit të propozimit dhe verifikimeve, drejtori i Përgjithshëm i Agjencisë së Mbikëqyrjes Policore, nëpërmjet një vendimi të arsyetuar, miraton ose jo përfitimin e këtij shpërblimi.
Në rast sëmundjeje të rëndë apo fatkeqësie familjare, punonjësi i Agjencisë së Mbikëqyrjes Policore përfiton ndihmë financiare në masën e 1 page mujore (pagën më të lartë mujore të nivelit të ulët drejtues).
Punonjësi i Agjencisë gëzon të drejtën e pushimit vjetor të pagueshëm, si më poshtë vijon:
- 45 ditë kalendarike për punonjësit e nivelit të lartë drejtues
- 40 ditë kalendarike për punonjësit e nivelit të mesëm drejtues
- 35 ditë kalendarike për punonjësit e nivelit të ulët drejtues
- 30 ditë kalendarike për punonjësit e nivelit ekzekutiv
Ky vendim hyn në fuqi pas botimit në “Fletoren zyrtare”.
p.k\dita