Sali Berisha i ka dhënë zë disa portaleve që publikojnë prej ditësh një lajm se shefja e shërbimit sekret shqiptar Vlora Hyseni, ndodhej prej 10 ditësh në Beograd.
Por pamjet filmike të datës 22 maj, tregojnë se Hyseni ishte në Tiranë. Ajo u shfaq në ceremoninë e prezantimit të nisjes së stërvitjes ushtarake “Defender Europe 2023” të NATO-s, pjesë e të cilës është edhe Shqipëria.
Pas portaleve, Berisha e çoi shumë larg akuzën ndaj shefes së shërbimi sekret shqiptar, emëruar në këtë detyrë vetëm pak kohë më parë, duke e akuzuar se po çon “sekretet e NATO-s te Putini”(!!).
Shefja e shërbimit sekret nuk është dhe nuk ka qenë në Serbi.
Duket se kemi të bëjmë me një lajm të rremë, aq të zakonshëm në mediat online në Shqipëri dhe që viktimë e të cilit ka rënë për të disatën herë edhe Berisha.
Por konteksti në të cilin është hedhur në publik ky lajm ngre shumë dyshime. Berisha e lidh me Kosovën. Në veri të Kosovës po ndodhin zhvillime që kanë vënë në alarm të gjithë partnerët strategjikë të shqiptarëve që kërkojnë në një zë ulje të tensioneve dhe qetësi.
Në një kohë kur nga të gjithë kërkohet që të bëjnë thirrje për uljen e tensioneve Berisha bën të kundërtën duke u mbështetur mbi një lajm të rremë.
