Kryeministri Edi Rama, gjatë një fjalimi sot, pretendoi se organizatorët e protestës para Parlamentit kishin përdorur si “mburojë politike” një nënë me djalin e saj autik, ndërsa u mburr me dyfishimin e ndihmës financiare për këtë kategori.
Mirëpo, dëshmia e vetë nënës dhënë për gazetarin Osman Stafa nga streha e saj pa ujë e pa drita në Shkozë, shkërmoqi pretendimet zyrtare.
Ajo sqaroi se ishte gjendur krejt rastësisht mes trazirave ndërsa udhëtonte nga Kamza për të dërguar të birin në terapi, ku madje u prek edhe nga lënda djegëse e përdorur nga policia.
Më tej, ajo zbuloi anën e fshehur të “skemës së re” sociale: dyfishimi i ndihmës vlen vetëm për fëmijët deri në 18 vjeç, duke lënë krejtësisht pa mbështetje të shtuar personat madhorë me të njëjtat nevojat speciale, siç është djali i saj 19-vjeçar.
Të mbetur pa përkrahje shtetërore, shpëtimi i tyre erdhi nga solidariteti i jashtëzakonshëm i shqiptarëve, të cilët përmes një fushate në GoFundMe grumbulluan mbi 130,000 dollarë, duke i siguruar familjes një strehë e dinjitet që shteti ia mohoi.
Ndiqni VIDEON deri në fund:
