Një tornado e madhe diellore, afërsisht 14 herë më e madhe se Toka është parë duke shpërthyer nga sipërfaqja e diellit dhe duke u shpërndarë në hapësirë.
Shpërthimi ndodhi më 17 mars.
Mund të kishim humbur ngjarjet e fundit në hapësirë nëse nuk do të ishte Observatori Dinamik Diellor i NASA-s (SDO), i cili kapi në kamera kolonën rrotulluese të plazmës diellore që ngrihej nga ylli i madh.
Materiali që shihet duke u rrotulluar në videon e tornados është plazma; një gaz i nxehtë i cili përbëhet nga hidrogjen dhe helium.
Plazma udhëton përgjatë një strukture të përdredhur të fushave magnetike, por mund të shpërthejë nga jashtë kur struktura bëhet e paqëndrueshme.
Duket sikur tornado po udhëton vertikalisht larg Diellit, megjithëse Nicolas Labrosse, një astronom në Universitetin e Glasgow ka shpjeguar më parë se “plazma lëviz kryesisht horizontalisht përgjatë vijave të fushës magnetike” dhe është pikërisht rruga e shikimit, e ngjeshur në qiell që e bën atë të duket si një tornado e tërbuar dhe e gjatë.
Nëse po pyesni se çfarë është në të vërtetë një tornado diellore, Astronomy & Astrophysics shpjegon se termi përdoret për të përshkruar strukturat magnetike rrotulluese mbi sipërfaqen e Diellit.
Kur fenomeni u kap nga Observatori Dinamik Diellor i NASA-s në vitin 2012, ata shkruan: “Nën vështrimin e vazhdueshëm të anijes kozmike, fusha magnetike e padukshme e Diellit tradhton praninë e saj duke përkulur gazin e ngarkuar, ose plazmën, në modele magjepsëse vizuale.”
j.l./ dita
