Tensione jashtë Kuvendit: Opozitë e shitur! Incident me Tërmet Peçin, e ndjekin nga pas: Hajdut! Godasin me vezë makinat e deputetëve (VIDEO)

Me thirrjet “Ju erdhi fundi” dhe “parlamenti i krimit” një grup qytetarësh u mblodhën në protestë jashtë Kuvendit, ndërsa deputetët ishin në seancë plenare. Thirrja nuk shkoi vetëm për dorëheqjen e kryeministrit Edi Rama, por edhe kundrejt opozitës duke e quajtur “opozitë e shitur”.

Tubimi ishte paralajmëruar një ditë më parë pas protestës të përnatshme te Kryeministria, ndërsa protestuesit në kor thërritën ‘Rama në burg, Berisha në burg”. Emrat e liderëve të dy partive kryesore u shfaqën edhe të shkruara në një kosh plehrash, të cilin protestuesit e kishin marrë para godinës së Kuvendit.

Të tjerë protestues me spraj në tokë kanë shkruar një prej thirrjeve ‘refren’ të protestës “parlamenti i krimit”. Prezenca e deputetit të PS, Tërmet Peçi, ndërsa po kalonte jashtë Kuvendit i irritoi protestuesit. Ata ndoqën nga pas ligjvënësin mes thirrjeve “hajdut”, “PD-PS, këlyshët e komunistëve”, “nuk na përfaqësoni”.

Organizatorët i kishin furnizuar protestuesit edhe me vezë, të cilat i përdorën për të sulmuar makinat që dilnin nga Kuvendi. Moment që krijoi përplasje mes tyre dhe policisë. Këta të fundit zhvendosën protestuesit për t’i hapur rrugën makinave që të kalonin, ndërsa në ndihmë erdhi edhe FNSH.

Lajmi në përditësim…