Tifozët e Inter Miamit tashmë janë të gjithë të çmendur pas Lionel Messit, i cili me dy gola dhe një asist e tërhoqi ekipin drejt fitores 4-0 kundër Atlanta United, në xhiron e dytë të Kupës së Ligës (një garë mes skuadrave nga Liga Meksikane dhe MLS).
Edhe në ndeshjen e parë, ku debutoi si zëvendësues, argjentinasi vendosi fatin e lojës me një super gol nga gjuajtja e lirë, në fund të ndeshjes së fituar 2-1 kundër Cruz Azul.
Entuziazëm i madh për tifozët në tribunat e mbushura të stadiumit “Drv Pnk” në Miami, të cilët megjithatë reaguan në mënyrë befasuese kur trajneri Gerardo Martino vendosi ta largonte nga fusha kampionin argjentinas të botës.
Pasi e çoi lojën në siguri të plotë për skuadrën e tij, me golat e shënuar në minutat e 8-të dhe të 22-të, Messi në pjesën e dytë dha asistin për Taylor, i cili vulosi gjithçka 4-0, përpara se të zëvendësohej nga Robinson në minutën e 78-të.
Në atë moment ndodhi diçka e papritur: pavarësisht se kishin mbetur edhe 12 minuta deri në bilbilin e trefishtë, tifozët nisën të largoheshin herët dhe masivisht nga stadiumi, siç shihet në një video që shumë shpejt u bë “virale” në rrjetet sociale.
