Në orët e para të mëngjesit, një helikopter i emergjencave civile është angazhuar në përpjekjet për shuarjen e zjarreve që kanë përfshirë zonat malore mbi fshatrat Lukovë, Sasaj, Shën Vasil dhe Kalasë. Siç tregojnë pamjet helikopteri është parë duke mbushur ujë nga deti, në ujërat poshtë Lukovës, për ta transportuar më pas drejt vatrave aktive të flakëve në kodrat përreth.
Zjarret kanë shpërthyer që në mbrëmjen e kaluar dhe kanë përparuar gjatë gjithë natës duke djegur sipërfaqe me ullishta dhe pyje, ndërsa rrezikuan seriozisht zonat e banuara. Erërat e forta dhe terreni i thepisur kanë vështirësuar ndjeshëm ndërhyrjen nga toka, ndërkohë që forcat zjarrfikëse janë në terren prej orësh të tëra.
Ndërhyrja ajrore këtë mëngjes ka qenë e domosdoshme për të frenuar përhapjen e flakëve, me helikopterin që ka kryer disa rotacione për të sjellë ujë nga deti. Banorët janë ende në ankth, ndërsa autoritetet thonë se situata është nën monitorim të vazhdueshëm.
(Pamje dërguar nga banorë në Lukovë, ora 08:20 e mëngjesit.)
