Presidentja e Komisionit Evropian, Ursula von der Leyen, i bëri sot thirrje Izraelit që të rishqyrtojë vendimin për zgjerimin e mëtejshëm të operacioneve ushtarake në Rripin e Gazës, ndërsa theksoi nevojën urgjente për një armëpushim dhe për ndihmë humanitare të papenguar në zonë.
“Të gjithë pengjet, të cilët po mbahen në kushte çnjerëzore, duhet të lirohen,” – deklaroi von der Leyen.
“Ndihma humanitare duhet të ketë qasje të menjëhershme dhe të papenguar në Gaza për të ofruar atë që nevojitet urgjentisht në terren”, – shtoi ajo.
“Një armëpushim është i nevojshëm tani.”
Deklarata vjen në një kohë tensionesh të rritura ndërkombëtare, pas njoftimit të Izraelit për zgjerimin e operacioneve në Gaza, një veprim që ka nxitur shqetësime të thella në rrafshin diplomatik dhe humanitar.
Ndërkohë, qeveria gjermane ka njoftuar pezullimin e eksporteve të pajisjeve ushtarake drejt Izraelit që mund të përdoren në Gazë, deri në një vendim të dytë. Kancelari Friedrich Merz deklaroi se ky vendim është një përgjigje ndaj planit të Izraelit për përshkallëzim të operacioneve, dhe synon të nxisë një kthesë drejt paqes.
“Lirimi i pengjeve izraelite dhe negociatat për armëpushim janë prioritetet tona kryesore,” – deklaroi Merz, duke theksuar shqetësimin e thellë për vuajtjet e civilëve palestinezë në konfliktin që ka hyrë në muajin e tij të dhjetë.
j.l./ dita
