Do të riintegrojmë me shpejtësi Krimenë në strukturën e vet shtetërore. Është presidenti ukrainas Volodymyr Zelensky që e thotë diçka të tillë, teksa gadishulli i aneksuar në 2014-tën nga Rusia, është bërë shënjestër e një sërë sulmeve të Ukrainës qatë javëve të fundit.
“Kam mbajtur një sërë takimesh të rëndësishme lidhur me përgatitjen e ngjarjeve ndërkombëtare në muajin gusht, mes të cilave Platformën e Krimesë. Po përgatisim edhe një listë masash ekonomike, sociale dhe të sigurisë. Mund ta riintegrojmë me shpejtësi Krimenë në strukturën shtetërore të Ukrainës”, tha Zelensky.
Ukraina vijon ethshëm kundërofensivën për sprapsjen e forcave ruse nga territori i vet, duke pretenduar përparim gradual në jug të vendit. Siç thuhet, luftime të ashpra po zhvillohen në rajonin e Zaporizhias, veçanërisht rreth fshatit të Robotyne, ku forca te Kievit po përpiqen të depërtojnë në linjat rusë të mbrojtjes. Ushtria vendase po avancon gjithashtu në drejtimet e Melitopol dhe Berdiansk, siç bënë me dije zyrtarë të mbrojtjes.
Sipas burimeve të Pentagonit, që citohen nga Neë York Times, në jug-lindje të vendit kundërofensiva ukrainase po zhvillohet me fuqinë e plotë. Ata flasin për mijëra përforcime në, mes të cilave trupa të trajnuar dhe të armatosur nga perëndimi që u janë bashkuar betejës.
Rusia sakaq, vijon sulmet ndaj infrastrukturës në qytetet port, veçanërisht në Odesa, duke vrarë të paktën një person. Aeronautika ushtarake ukrainase njoftoi se kishte rrëzuar 8 dronë rusë, Shahget gjatë natës, të lëshuara në disa drejtime. Po ashtu u rrëzuan, 36 raketa kruz të cilat kishin në objektiv rajonet e Kiev, Harkiv dhe Dnipro.
