Pronari i kompanisë “Delta Group” pjesë e së cilës është edhe “ Deutsch Color”, Luan Muça ka reaguar për zjarrin që ra mbrëmjen e djeshme në fabrikën në autostradën Tiranë-Durrës.
Muça falënderon ekipin e zjarrfikësve që në një kohë të shkurtër arritën të neutralizojnë zjarrin. Ai thotë se për fat të mirë, nga zjarri nuk pati asnjë fatkeqësi të parikuperueshme.
Muça garanton bashkëpunëtorët, klientët dhe miqtë se kompania ka marrë tashmë të gjitha masat për t’iu rikthyer prodhimit normal sa më parë.
MESAZHI I PLOTË:
Të dashur miq dhe bashkëpunëtorë të Deutsch Color!
Mbrëmjen e djeshme për shkaqe të cilat po verifikohen, fabrika jonë në Maminas, Bashkia Shijak, u përfshi në një zjarr masiv. Me një ndjenjë të thellë mirënjohje dhe me krenari dua tju njoftoj se kjo situatë e vështirë u përballua nga të gjithë bashkë! Fatmirësisht nuk patëm asnjë fatkeqësi të parikuperueshme, perveç dëmeve materiale.
Dëshiroj të shpreh mirënjohjen tonë maksimale ndaj te gjitha strukturave të shtetit për ndihmën e dhënë natën e djeshme në fabrikën e Deutsch Color. Nderim të veçantë ndaj reparteve të zjarrëfikësve të Forcave të Armatosura, Emergjencave Civile, Shijakut, Durrësit, Tiranës, Kamzës etj., të cilët luftuan për disa orë pandërpretje duke vendosur jetën e tyre në rrezik dhe bënë të mundur shpëtimin e pjesës më te madhe te fabrikës Deutsch Color.
Gjitjashtu dëshirojmë të falenderojmë sinqerisht, Ministrin e Brendshëm, drejtorët e përgjithshëm të Policisë së Shtetit dhe Emergjencave Civile, drejtuesit e shërbimit zjarrfikës të cilët u gjendën menjëherë në drejtimin e aksionit për shpëtimin e këtij investimi të rëndësishëm në Shqipëri.
Familja jonë Delta Group dhe Deutsch Color ju shprehim mirënjohjen dhe dëshirojmë të garantojmë miqtë, klientët, bashkëpunëtorët tanë në Shqipëri, Kosovë dhe kudo në botë se kemi marrë masat për rikthimin në prodhim brenda një kohe shumë të shkurtër.
Luan Muca,
Founder and Ceo Delta Group
p.c/dita
