Fjalimi i shumëpritur i udhëheqësit të grupit islamik shiit libanez Hezbollah, Hassan Nasrallah, lehtësoi shumë njerëz në Liban dhe më gjerë, të cilët kishin frikën e një zgjerimi të konfliktit.
Ai nuk njoftoi një përshkallëzim të sulmeve kundër Izraelit, por nga ana tjetër e la të hapur mundësinë e veprimeve të mëtejshme, shkruan BBC.
Një ditë pas fjalimit të tij, dhuna përgjatë kufirit Liban-Izrael vazhdoi përsëri. Hezbollahu tha se kishte nisur sulme të njëkohshme ndaj objektivave izraelite, ndërsa ushtria izraelite tha se ishte kundërpërgjigjur duke goditur pozicionet e Hezbollahut, duke përfshirë një post vëzhgimi.
Pavarësisht sulmeve të shpeshta, të dyja palët kanë ndërmarrë hapa për të shmangur një përshkallëzim të rrezikshëm dhe luftimet janë kufizuar në zonën kufitare.
Gjithashtu këtë mëngjes, kryeministri i përkohshëm libanez, Najib Mikati, takoi sekretarin amerikan të shtetit, Anthony Blinken, në Aman. Mikati theksoi rëndësinë e një armëpushimi në Gaza dhe ndalimin e asaj që ai e përshkroi si agresion izraelit në Libanin jugor, sipas një deklarate të lëshuar nga zyra e kryeministrit.
Mikati është në një pozitë të vështirë, pasi përpiqet të parandalojë që vendi i tij të tërhiqet në konflikt. Ai ka shumë pak – nëse ka – ndikim mbi Hezbollahun, forcën më të fuqishme ushtarake dhe politike në Liban. Kjo do të thotë se vendimet e marra nga grupi, i konsideruar si një organizatë terroriste nga MB dhe SHBA, jehonë shumë përtej bazës së tij mbështetëse.
a.c./dita
