Anija ku udhëtonin u konfiskua, Izraeli do të deportojë aktivistët e Gazës, mes tyre edhe Greta Thunberg

Një grup aktivistësh, përfshirë aktivisten suedeze Greta Thunberg, të cilët u ndaluan në një anije ndihmash për në Gaza, janë dërguar në një aeroport të Tel Avivit për deportim, tha Izraeli të martën. Mjeti lundrues që mbante 12 persona që përpiqeshin të sillnin ndihmë humanitare në Gaza u tërhoq në qytetin portual izraelit të Ashdodit të hënën, pasi u sekuestrua nga forcat izraelite në orët e para të mëngjesit.

Duke e cilësuar atë si një “jaht për selfie”, Izraeli tha se pasagjerët kishin mbërritur në aeroportin Ben Gurion për t’u kthyer në vendet e tyre të origjinës.

“Ata që refuzojnë të nënshkruajnë dokumentet e deportimit dhe të largohen nga Izraeli do të nxirren para një autoriteti gjyqësor”, tha ministria e jashtme izraelite në X.

Koalicioni i Flotiljes së Lirisë (FFC), grupi aktivist që operon anijen, tha se të gjithë aktivistët po transferoheshin në paraburgim të autoriteteve izraelite.

“Ata mund të lejohen të fluturojnë nga Tel Avivi që sonte”, tha ajo në mediat sociale.

Organizatorët thanë se Madleen synonte të sillte një sasi “simbolike” ndihme në Gaza, në kundërshtim me bllokadën detare izraelite. Ata thanë se anija u kap nga forcat izraelite në ujërat ndërkombëtare. Ndihma në bordin e Madleen përfshin oriz dhe formulë për foshnje, tha FFC-ja.

Në bord të anijes ishin qytetarë të Brazilit, Francës, Gjermanisë, Holandës, Spanjës, Suedisë dhe Turqisë – midis tyre Rima Hassan, një anëtare franceze e Parlamentit Evropian, dhe Omar Faiad, një gazetar francez i Al Jazeera-s.

Anija u nis nga Italia më 1 qershor për të rritur ndërgjegjësimin për kushtet e urisë në Gaza dhe për të shpërndarë ndihma. Izraeli thotë se bllokada e tij ndaj Gazës është e nevojshme për të parandaluar që armët të arrijnë te luftëtarët e Hamasit atje.

Të dielën, Ministri Izraelit i Mbrojtjes, Israel Katz, paralajmëroi se Izraeli do të veprojë kundër çdo përpjekjeje për të shkelur bllokadën. FFC-ja ka argumentuar se bllokada detare është e paligjshme, duke e karakterizuar deklaratën e Katz-it si një shembull të kërcënimit të Izraelit për përdorim të paligjshëm të forcës kundër civilëve dhe “përpjekjes për të justifikuar atë dhunë me shpifje”.

Në vitin 2010, komandot izraelite vranë 10 aktivistë turq kur ata hipën në anijen turke Mavi Marmara, e cila po udhëhiqte një flotilje ndihmash drejt Gazës. Izraeli kohët e fundit filloi të lejojë ndihmë të kufizuar në Gaza pas një bllokade tokësore tremujore, duke i dhënë përparësi shpërndarjes përmes Fondacionit Humanitar të Gazës, i cili mbështetet nga Izraeli dhe SHBA-të, por dënohet gjerësisht nga grupet humanitare.

Në një postim në X herët të hënën, ministria e jashtme izraelite tha: “Ndërsa Greta dhe të tjerët u përpoqën të organizonin një provokim mediatik, qëllimi i vetëm i të cilit ishte të fitonin publicitet – dhe që përfshinte më pak se një kamion të vetëm me ndihma – më shumë se 1,200 kamionë me ndihma kanë hyrë në Gaza nga Izraeli brenda dy javëve të fundit, dhe përveç kësaj, Fondacioni Humanitar i Gazës ka shpërndarë afër 11 milionë vakte direkt për civilët në Gaza. Ka mënyra për të dërguar ndihma në Rripin e Gazës – ato nuk përfshijnë selfie në Instagram.”

Kanë kaluar 20 muaj që kur Izraeli nisi një fushatë ushtarake në Gaza në përgjigje të sulmit të paprecedentë ndërkufitar të udhëhequr nga Hamasi ndaj Izraelit më 7 tetor 2023, në të cilin u vranë rreth 1,200 njerëz dhe 251 të tjerë u morën peng. Të paktën 54,880 njerëz janë vrarë në Gaza që atëherë, sipas ministrisë së shëndetësisë të territorit të drejtuar nga Hamasi.

j.l./ dita