Ish-kryebashkiaku i Pogradecit Eduart Kapri është paraqitur ditën e sotme në Prokurorinë e Posaçme. Mësohet se Kapri akuzohet nga SPAK për shpërdorim detyre dhe shkelje të barazisë në tendera. Por vetëm disa ditë më parë, Gjykata e Apelit në GJKKO e ka shpallur të pafajshëm Kaprin. Ndërkohë që mësohet se organi i akuzës i ka hapur një çështje të re hetimore.
Apeli i GJKKO-së ka konfirmuar vendimin e GJKKO që i shpalli të pafajshëm ish-kryetarin e Bashkisë së Pogradecit, Eduart Kaprin dhe 5 ish-vartësit e tij, të cilët akuzoheshin nga SPAK për abuzimin me një tender për drutë. SPAK kishte ankimuar në Apelin e Posaçëm vendimin e GJKKO.
Prokuroria e Posaçme akuzonte Kaprin se në bashkëpunim me anëtarët e Komisionit të Vlerësimit të Ofertave, Enkeleida Kllomollari, Nexhmi Torro dhe Avdulla Cano abuzuan me tenderin me vlerë 9.2 milion lekë për blerje dru zjarri në vitin 2017, duke favorizuar një prej kompanive që garonte.
Kapri dhe ish-vartësit sipas SPAK, jo vetëm abuzuan me një tender, por në 28 qershor 2019 në tre shkolla dhe një kopsht janë kapur në flagrancë nga policia duke mbyllur me çelës tre shkolla të miratuara si qendra votimi prej KQZ-së.
j.l./ dita
