Lëvizja militante palestineze e Hamasit liroi 4 ushtare izraelite, të cilat i mbante peng që prej tetorit të vitit 2023, në këmbim të 200 të burgosurve palestinezë. Gratë u drejtuan në një podium, në qytetin e Gazës, mes turmave të mëdha dhe rrethoheshin nga luftëtarët e armatosur të Hamasit.
Ato përshëndetën me dorë dhe buzëqeshën para se të shoqëroheshin drejt automjeteve të Kryqit të Kuq dhe të transportoheshin te forcat izraelite. Qindra izraelitë u mblodhën në të ashtuquajturin Sheshi i Pengjeve në Tel Aviv, duke qarë, duke u përqafuar e duke brohoritur teksa shihnin momentin e dorëzimit të grave në një ekran gjigand. Emocione të forta shpërthyen veçanërisht mes të afërmve të pengjeve.
Prof. Ruhama Albagh, halla e Liri Albagut: “Është një gëzim i papërshkrueshëm dhe nuk besoja se do ta jetonim këtë moment. Nuk mund ta them me fjalë; është gëzim i pastër.”
Katër ushtaret, Karina Ariev, Daniela Gilboa, Naama Levy dhe Liri Albag, ishin të stacionuara në një post vëzhgimi pranë Gazës dhe u rrëmbyen nga luftëtarët e Hamasit që mësynë bazën e tyre më 7 tetor të 2023-shit. Mes 200 të burgosurve palestinezë që lirohen si pjesë e këmbimit, të parashikuar në marrëveshjen e armëpushimit, përfshihen edhe militantë të dënuar me burgim të përjetshëm për përfshirjen e tyre në sulme ku janë vrarë dhjetëra njerëz. 70 prej tyre do të deportohen, bëri të ditur Hamasi.
Shkëmbimi i së shtunës është i dyti që prej hyrjes në fuqi të armëpushimit më 19 janar. Në fazën e parë prej 6 javësh të ujdisë, Hamasi ka pranuar të lirojë 33 pengje, përfshirë gra, fëmijë, burra të moshuar dhe të plagosur, në këmbim të qindra të burgosurve palestinezë. Po ashtu, trupat izraelite pritet të tërhiqen nga disa prej pozicioneve kyçe në Gaza.
j.l./ dita
