Qeveria izraelite ka njoftuar se është pajtuar me propozimin e Presidentit amerikan Donald Trump për vendosjen e një armëpushimi me Iranin, pas tensioneve të rritura mes dy vendeve.
Në një deklaratë të lëshuar nga zyra e Kryeministrit Benjamin Netanjahu, thuhet se Izraeli do t’i qëndrojë marrëveshjes për armëpushim, por paralajmëron se do të reagojë “me forcë” ndaj çdo shkeljeje të saj nga ana e Iranit.
“Ne kemi arritur objektivin tonë strategjik për të eliminuar kërcënimin bërthamor dhe balistik të regjimit iranian”, thuhet në deklaratë. Po ashtu, qeveria izraelite falënderon Presidentin Donald Trump për “mbështetjen në mbrojtje dhe pjesëmarrjen aktive në arritjen e kësaj marrëveshjeje historike.”
Po ashtu Izraeli thekson se kërcënimi i menjëhershëm ekzistencial i armëve bërthamore dhe raketave balistike të Iranit është hequr. Përveç kësaj, thuhet se ushtria izraelite goditi rëndë objektivat qeveritare në zemër të Teheranit gjatë 24 orëve të fundit, si dhe eliminoi një tjetër shkencëtar të lartë bërthamor.
“Përveç kësaj, IDF ka arritur kontroll të plotë ajror mbi qiellin e Teheranit, ka shkaktuar dëme të rënda në udhëheqjen ushtarake dhe ka shkatërruar dhjetëra objektiva qendrore të qeverisë iraniane”, shtohet në deklaratë.
Kryeministri Netanjahu pritet të mbajë një deklaratë publike më vonë gjatë ditës, ku pritet të japë më shumë detaje mbi marrëveshjen dhe hapat e ardhshëm.
j.l./ dita
