Presidentja e Kosovës, Vjosa Osmani ka mbajtur ditën e sotme (15 dhjetor) fjalimin e saj vjetor para deputetëve të Kuvendit, ku ka trajtuar ngjarje të rëndësishme.
Në fjalimin e saj ajo shprehet krenare për punën e bërë gjatë një viti, ndërsa numra të takimeve e bashkëbisedimeve me krerë shtetesh e qeverish, si dhe me udhëheqës të tjerë institucionalë e udhëheqës të organizatave më të fuqishme ndërkombëtare.
Duke u ndaluar tek ngjarjet në Banjskë, integrimi apo edhe bisedimet për dialogun me Serbinë, Osmani thotë se Kosova nuk zmbrapset, por do t’i mbrojë kufijtë e saj me çdo kusht.
Një lajm i rëndësishëm për Prishtinën ishte propozimi i draft-statutit nga komuniteti evropian për të ndihmuar në procesin e dialogut mes Kosovës dhe Serbisë.
Osmani paralajmëroi para deputetëve se ky draft-statut do të bëhej gati për t’u nisur drejt Gjykatës Kushtetuese.
Sipas saj, nuk duhet lejuar një pushtet i ndërmjetëm i qeverisjes apo anomali të tjera që rrezikojnë funksionimin e brendshëm të shtetit.
“Siç e dini, së fundi Kosovës i është dorëzuar një propozim, draft-statut për Asociacionin e komunave me shumicë serbe, i hartuar nga partnerët tanë. Përderisa vlerësimi i hartuesve është se një draft i tillë është në harmoni me Kushtetutën, dua të ritheksoj se institucioni që duhet ta bëjë këtë vlerësim duke u udhëhequr nga parimi i pavarësisë dhe profesionalizmit është Gjykata Kushtetuese e Republikës së Kosovës. Është me rëndësi që të gjithë ne, pa dallim partiak, të ulemi dhe bashkarisht të përgatisim komentet tona bazuar në shqetësimet që mund t’i kemi dhe t’i dërgojmë ato në Gjykatën Kushtetuese kurdo që ky draft do të dorëzohet para këtij institucioni.
Qëllimi ynë i përbashkët duhet të jetë që të sigurojmë përputhshmëri të plotë me Kushtetutën e Kosovës. Dhe të mos lejojmë një pushtet të ndërmjetëm të qeverisjes apo anomali të tjera që rrezikojnë funksionimin e brendshëm të shtetit tonë”, ka deklaruar Presidentja.
j.l./ dita
