Atletico Madrid shënoi pesë gola ndaj rivalëve të qytetit, Real Madridit, për herë të parë në gati 75 vjet, në një nga derbit më dramatikë të viteve të fundit.
Fitorja 5 me 2 ndaj Real Madridit ishte vetëm hera e katërt në histori që Atletico arrin të realizojë pesë gola në një derbi madrilen, hera e fundit në nëntor të vitit 1950, në fitoren 6-3.
Kjo ishte humbja e parë për Realin këtë sezon, pas një serie prej gjashtë fitoresh radhazi në La Liga dhe suksesit në Ligën e Kampionëve ndaj Marsejës. Herën e fundit që “Los Blancos” kishin pësuar pesë gola në kampionat ishte humbja 5-1 ndaj Barcelonës në tetor 2018.
Atletico kaloi shpejt në avantazh me goditjen me kokë të Robin Le Normand, por Reali përmbysi me dy gola të bukur nga Kylian Mbappe dhe Arda Guler. Megjithatë, Alexander Sorloth riktheu barazpeshën në fundin e pjesës së parë me një tjetër goditje me kokë.
Në pjesën e dytë, Atletico mori kontrollin. Julian Alvarez, që më parë kishte goditur shtyllën, shënoi nga pika e bardhë pas një penalltie të fituar nga Nico Gonzalez, dhe më pas realizoi edhe një gol tjetër nga goditja e dënimit. Antoine Griezmann vulosi fitoren me golin e pestë në fundin e ndeshjes.
Rezultati konfirmon dominimin e Atleticos në derbit e fundit në kampionat, ku nuk ka humbur në gjashtë përballjet e fundit ndaj Real Madridit.
Le Normand zhbllokoi sfidën pas një krosimi të Giuliano Simeone-s, por Mbappe reagoi shpejt me një gol të bukur. Guler më pas përmbysi rezultatin me një goditje gjysmë-volej pas asistit të Vinicius Jr. Por Atletico u përgjigj menjëherë dhe barazoi me Sorloth, ndërsa në pjesën e dytë, dy golat e Alvarez thelluan diferencën. Griezmann shënoi golin e pestë pas një kundërsulmi perfekt.
Reali, ndonëse ruan kreun e tabelës me dy pikë më shumë se Barcelona, u përball me një paraqitje nën pritshmëri, siç e pranoi edhe trajneri Xabi Alonso, duke theksuar se skuadra nuk luajti në nivelin e zakonshëm dhe se duhet të reagojë.
Nga ana tjetër, trajneri Diego Simeone, me lot në sy, foli për një fillim të vështirë sezoni, por edhe për përpjekjet e gjithë skuadrës për të rikthyer formën.
Të dyja ekipet tani i kthejnë sytë nga Liga e Kampionëve: Reali udhëton drejt Kazakistanit për t’u përballur me Kairat Almaty, ndërsa Atletico pret Eintracht Frankfurtin në shtëpi.
j.l./ dita
