Policia ka reaguar për ndarjen nga jeta të Baba Hekuran Nikollari, i cili u nda papritur nga jeta në moshën 61-vjeçare mbrëmjen e së hënës (3 Shkurt).
Raportohet se Baba Hekuran Nikollari u gjet pa shenja jete rreth orës 22:00, në vendin e quajtur “Teqeja e Alipostivanit”.
Sipas bluve, në trupin e tij nuk janë vërejtur shenja dhune dhe paraprakisht dyshohet se ka humbur jetën nga shkaqe natyrale.
Pritet ekspertiza mjekoligjore për të përcaktuar shkakun e humbjes së jetës.
Drejt Përmetit janë nisur edhe përfaqësues të Kryegjyshatës Botërore të Bektashinjve, për të mbikëqyrur nga afër të gjithë procesin. Ndërkohë Policia e Shtetit pritet të ketë një njoftim për ngjarjen.
Baba Hekuran Nikollari shërbente prej vitesh në teqenë emblemë të bektashizmit në jug të vendit.
Baba Hekurani u lind më 7 shtator të 1963 në Seniçan të Përmetit. Ai kreu shkollën fillore dhe shkollën 8-vjeçare “Riza Velçishti” në Seniçan, më tej filloi shkollën e mesme “Kamber Bënja” në Bënjë.
Pas 2 vitesh, i detyruar nga vështirësitë ekonomike të familjes, e ndërpreu shkollën dhe filloi punën në kooperativën e Mërtinjit, pastaj në Bonifikimin e Përmetit, në Ndërmarrjen e Ujërave Këlcyrë dhe në Shfrytëzim-Përpunimin e Drurit të Përmetit.
Më 1992 emigroi në Greqi. Në vitin 2000 u kthye në atdhe, në Seniçan. Në Seniçan rindërtoi Mekamin në vendin e quajtur “Ahuri i Nakove”, i cili edhe sot quhet “I miri i Nakove”.
Më 22 mars 2001 shkoi në Alipostivan, ku ringriti Teqenë e Baba Aliut, e cila është një nga më të mëdhatë në vend.
Njoftimi i Policisë:
Përmet/Më datë 03.02.2025, rreth orës 22:00, në vendin e quajtur “Teqeja e Alipostivanit”, është gjetur pa shenja jete dhe pa shenja dhune, shtetasi H. N., 61 vjeç, Baba i Teqes.
Nga veprimet e para hetimore dyshohet se ky shtetas ka humbur jetën nga shkaqe natyrale. Pritet ekspertiza mjekoligjore për të përcaktuar shkakun e humbjes së jetës.
Grupi hetimor vijon punën për sqarimin e plotë të rrethanave të rastit.
Presidenti i Republikës Barjam Begaj ka reaguar sot për ndarjen nga jeta të Baba Hekuran Nikollarit.
“Mësova me dhimbje kalimin nga kjo jetë të Baba Hekuran Nikollarit, klerikut që vazhdoi veprën e Baba Aliut, duke shërbyer si frymëzim dhe udhërrëfyes për komunitetin bektashi të qarkut të Gjirokastrës e më gjerë. Falë punës së jashtëzakonshme të Baba Hekuran Nikollarit, Teqeja e Baba Aliut në Alipostivan u ringrit nga rrënojat. Ai e riktheu këtë vend të shenjtë në simbol të vlerave shqiptare, monument të qetësisë, dashurisë dhe ndihmës për të pamundurit,” shprehet presidenti Begaj në njoftimin për mediet.
Presidenti Begaj vlerëson angazhimin dhe përkushtimin e Baba Hekuran Nikollarit, duke e cilësuar atë një mbrojtës të identitetit kombëtar.
“Baba Hekurani do të kujtohet gjithmonë për përkushtimin ndaj besimtarëve, si mbrojtës i identitetit kombëtar dhe përhapjes së harmonisë fetare. I shpreh ngushëllimet më të ndjera familjes, besimtarëve bektashinj dhe i bashkohem lutjeve për prehjen në paqe të shpirtit të Baba Hekuran Nikollarit,” thuhet në njoftim.
Për ndarjen nga jeta të Baba Hekuran Nikollarit ka pasur një reagim edhe nga bashkia e Përmetit.
“Me hidhërim të thellë morëm lajmin e ndarjes nga jeta, në mënyrë të papritur, të Baba Hekuran Nikollarit, udhëheqësit shpirtëror të Teqesë së Alipostivanit në Përmet. Një njeri i përkushtuar ndaj besimit, vlerave të kombit dhe gjithë komunitetit, Baba Hekurani ishte njeriu që ringriti nga rrënimi këtë vend të shenjtë, duke e kthyer Teqenë e Alipostivanit në një qendër të rëndësishme shpirtërore dhe një strehë dashurie për këdo që e vizitonte,” thuhet në reagimin e këtij institucioni.
“Me një zemër të madhe dhe një vizion të qartë, ai punoi pa u lodhur për ta bërë këtë teqe një simbol të besimit, paqes dhe harmonisë fetare,” cilësohet në mesazh.
j.l./ dita
