Barcelona duket se nuk ka ndërmend të fitojë pikë të tjera në La Liga pas festës së titullit kampion. Skuadra “blaugrana”, tashmë pa motiv për të fituar, nuk e ka problem të humbasë përballë çdo kundërshtari.
Pas humbjes me Real Sociadadin në “Camp Nou”, Barça u dorëzua pa kushte me rezultatin e thellë 3-1 në fushën e Valladoliditt, që vazhdon të luftojë për mbijetesë. Sa i përket ndeshjes, ajo kishte pak histori. Takimi u zhbllokua që në minutat e para nga autogoli i Christensen, për të ardhur tek thellimi i epërsisë në 2-0 në të 22-tën falë golit të Larin.
Në pjesën e dytë realizoi për vendësit edhe Plata, por pesë minuta para fundit të kohës së rregullt shkurtoi diferencën në 3-1 Lewandowski. Sulmuesi polak vazhdon të kryesojë listën e golashënuesve me 23 gola.
