Stefano Pioli, trajner i Milanit, ka konfirmuar se Rafael Leão është rikuperuar nga lëndimi që e pengoi të përballej me Interin, në ndeshjen e parë të gjysmëfinales së Championsit dhe se është gati për duelin e dytë evropian me rivalin e Milanit. “Rafael Leão është pa dyshim më mirë. Ai, Krunic dhe Junior Messias do të grumbullohen. Nëse gjithçka shkon mirë, nesër (e martë) do të luajnë”, tha trajneri gjatë konferencës për shtypin para takimit. Për mundësitë që Milani të përmbysë rezultatin e ndeshjes së parë (humbjen 0-2) dhe të shkojë në finale, Pioli tha: “Ata që merren me futbollin e dinë që ndeshjet mbarojnë vetëm kur gjyqtari fishkëllen. Surprizat ekzistojnë dhe ju duhet të besoni në to. Ne besojmë”.
Nga ana tjetër, Interi do të kërkojë të mbrojë avantazhin 2-0 ndaj Milanit, të siguruar në ndeshjen e parë, për të siguruar biletën e parë për finalen e Ligës së Kampionëve, që do të luhet në Stamboll më 10 qershor. Trajneri Simone Inzaghi doli në konferncën për shtyp, ku deklaroi se skuadra duhet të hyjë në fushë sikur ndeshja të jetë 0-0 dhe të luftojë fort për të siguruar finalen. “Luajmë një nga ndeshjet më të rëndësishme dhe duhet të futemi në fushë sikur gjithçka të jetë barazim 0-0. Duhet të japim gjithçka që t’ia dalim të mbajmë gjallë ëndrrën tonë. Kemi në dispozicion thuajse të gjithë lojtarët dhe Lukaku është në formë, por nuk besoj që mund të luajë tre ndeshje në 7 ditë. Megjithatë vlerësimet për formacionin i bëjmë nesër”, u shpreh tekniku zikaltër.
UEFA ka caktuar një arbitër francez për derbin e Milanos dhe ndonëse kuqezinjtë kanë plot 4 futbollistë francezë në ekip, kjo nuk e shqetson aspak Inzaghin. “Nuk mendoj aspak për arbitrimin nesër, por për atë që ne duhet të bëjmë në fushë. Arbitri do të dijë të jetë propfesionist dhe të njëjtën gjë duhet të bëjmë edhe ne, të përqendrohemi te loja jonë”, tha trajneri i Interit.
