Danimarka i ka dërguar një mesazh privat ekipit të Presidentit të zgjedhur amerikan, Donald Trump, ku shpreh gatishmërinë për të diskutuar mbi rritjen e sigurisë në Groenlandë apo dhe rritjen e pranisë ushtarake të Shteteve të Bashkuara në këtë territor, njoftoi agjencia amerikane e lajmeve ‘Axios’ të shtunën.
Trump, i cili merr detyrën më 20 janar, ka thënë se kontrolli amerikan mbi Groenlandën, një territor gjysmë-autonom danez, është një “domosdoshmëri absolute”.
Ai nuk ka përjashtuar përdorimin e mundshëm të mjeteve ushtarake ose ekonomike, përfshirë vendosjen e tarifave kundër Danimarkës, për arritjen e këtij qëllimi.
‘Axios’ tha se qeveria daneze po përpiqet të bindë zotin Trump se shqetësimet e tij të sigurisë mund të trajtohen pa pretenduar Groenlandën.
Kryeministrja daneze Mette Frederiksen tha në fillim të kësaj jave se kishte kërkuar një takim me zotin Trump, por nuk priste që kjo gjë të ndodhte para inaugurimit të tij më 20 janar.
Kryeministri i Groenlandës Mute Egede tha gjithashtu se ishte gati të bisedonte me zotin Trump, ndërsa kërkoi të respektohen ato që i quajti, aspirata për pavarësi të ishullit.
Zyrtarët danezë kanë thënë më parë se Grenlanda nuk është në shitje.
