Presidenti i Shteteve të Bashkuara, Donald Trump, ka përsëritur përkushtimin e tij për të gjetur një zgjidhje paqësore mes Rusisë dhe Ukrainës, pavarësisht dyshimeve që ekzistojnë për realizimin e një takimi ballë për ballë mes Vladimir Putinit dhe Volodymyr Zelenskyt, raportoi CBS News.
“E ndjek nga afër, e shoh dhe flas për këtë me Presidentin Putin dhe Presidentin Zelensky”, tha Trump në një intervistë telefonike të mërkurën për CBS News. “Diçka do të ndodhë, por ata ende nuk janë gati. Megjithatë, diçka do të ndodhë. Ne do ta çojmë deri në fund.”
Trump konfirmoi më herët se planifikon të ndërmarrë hapa të rinj në lidhje me luftën në Ukrainë gjatë ditëve në vijim, pas samitit që zhvilloi me Vladimir Putinin në Alaska në gusht, një takim që nuk solli përparim të prekshëm.
Sipas një zyrtari të Shtëpisë së Bardhë, Trump pritet të zhvillojë sot një bisedë telefonike me Presidentin Zelensky.
Ndërkohë, Presidenti rus Vladimir Putin u shpreh të mërkurën se është i gatshëm të takohet me homologun ukrainas në Moskë, duke theksuar se një takim i tillë duhet të jetë mirë i përgatitur dhe të sjellë rezultate konkrete.
Megjithatë, Ministria e Jashtme e Ukrainës e ka refuzuar mundësinë që kryeqyteti rus të jetë vendi i zhvillimit të këtij takimi.
Trump u shpreh për CBS News se është i zhgënjyer nga gjakderdhja mes Rusisë dhe Ukrainës, por do të vazhdojë të punojë për arritjen e një marrëveshjeje paqësore.
“Besoj se do ta zgjidhim. Sinqerisht, kjo çështja e Rusisë mendova se do të ishte ndër më të lehtat nga konfliktet që kam ndalur në të kaluarën, por duket se është pak më e vështirë se disa të tjera”, tha Trump.
Trump foli gjithashtu për pjesëmarrjen e Putinit në një ceremoni në Kinë për përkujtimin e përfundimit të Luftës së Dytë Botërore, ku ishin të pranishëm edhe Presidenti kinez Xi Jinping dhe udhëheqësi i Koresë së Veriut, Kim Jong Un.
“E kuptoj pse e bënë dhe shpresonin që unë po e ndiqja dhe po, e ndoqa,” tha Trump. “Marrëdhënia ime me të gjithë këta liderë është shumë e mirë. Do të shohim sa e mirë është në javët në vijim.”
Megjithatë, një ditë më parë, Trump kishte deklaruar se është “shumë i zhgënjyer” nga Putin dhe në një postim në platformën Truth Social, shkroi se Xi, Putin dhe Kim “po bashkëpunojnë kundër Shteteve të Bashkuara”.
Nga ana tjetër, Kremlini reagoi duke thënë se Putin nuk po komploton kundër SHBA-së dhe se komentet e Trump ishin sarkastike.
Putin theksoi gjithashtu se të gjitha vendet me të cilat Rusia zhvilloi bisedime në Kinë mbështetën samitin ruso-amerikan të mbajtur në Alaska dhe shprehën shpresën se dialogu mund të ndihmojë për t’i dhënë fund luftës në Ukrainë.
j.l./ dita
Zelinisti po shkoi ne Moske i shkurton jeten vetes,ose do te defirmohet ne fytyre si ai qe ishte perpara i tij ndenese qe filo rus!?