Policia e Lezhë ka reaguar lidhur me ngjarjen e ndodhur mbrëmjen e kaluar në autostradën “Mamurras–Laç”, pranë kryqëzimit të Sanxhakut, ku ish-kryetari i Partisë Demokratike në njësinë administrative Dajç, në Zadrimë, Sokol Toma u dhunua nga disa persona.
Blutë bëjnë me dije, se 53-vjeçari është goditur me sende të forta nga disa persona, duke pësuar dëmtime në trup.
Menjëherë pas marrjes së njoftimit, në vendngjarje kanë mbërritur shërbimet e Policisë dhe grupi hetimor, të cilët kanë nisur veprimet për zbardhjen e plotë të ngjarjes. Sipas njoftimit të policisë, janë sekuestruar pamjet filmike të kamerave të sigurisë, ndërsa po kryhen edhe veprime të tjera hetimore për identifikimin dhe kapjen e autorëve.
Mbrëmjen e kaluar, rreth orës 22:00, një ngjarje e rëndë ka ndodhur në aksin rrugor Mamurras-Laç, në Sanxhak, ku ish-kryetari i PD-së për njësinë administrative Dajç, Sokol Toma, ka rënë pre e një sulmi brutal.
Persona të paidentifikuar dhe të maskuar e kanë goditur 53-vjeçarin me sende të forta, duke i shkaktuar lëndime serioze në trup. Për shkak të gjendjes së rënduar shëndetësore, ai është transportuar me urgjencë drejt Spitalit të Traumës në Tiranë për ndihmë mjekësore më të specializuar.
Sipas burimeve nga Spitali i Traumës, agresorët i kanë thyer këmbët dhe i kanë prerë veshin 53-vjeçarit
Ndërkohë, Ministria e Shëndetësisë ka njotuar se Toma, ndodhet në urgjencën e Spitalit Universitar të Traumës, koshient dhe në gjëndje e stabilizuar e se do të vijojë të marrë trajtim në QSUT.
Njoftimi i Policisë:
Në lidhje me ngjarjen e ndodhur rreth orës 22:00 të datës 09.05.2026, në autostradën “Mamurras–Laç”, në afërsi të kryqëzimit të Sanxhakut, ku shtetas ende të paidentifikuar, kanë goditur me sende të forta, shtetasin S. T., 53 vjeç, banues në Lezhë, të cilit i kanë shkaktuar dëmtime në trup, sqarojmë se:
Menjëherë pas njoftimit, kanë shkuar në vendngjarje shërbimet e Policisë dhe grupi hetimor. Grupi hetimor, në drejtimin e Prokurorisë, po vijon veprimet intensive, ka sekuestruar pamjet filmike të kamerave në një territor të gjerë, dhe po kryen një sërë veprimesh të tjera hetimore me qëllim zbardhjen e rrethanave, identifikimin dhe kapjen e autorëve.
j.l./ dita
