Gjilani bën “vetëvrasje” në sfidën me Progres Niedercorn të zhvilluar në “Fadil Vokrri”, duke shpërdoruar një mundësi të artë për t’u kualifikuar në raundit e dytë të Conference League.
Skuadra e drejtuar nga Klodian Duro u mposht 0-2 në shtëpi dhe me rezultatin e përgjithshëm 2-4 del jashtë kompeticionit. Ndëshkimi i Sinanit që në minutën e 14-të me karton të kuq kushtëzoi lojën e Gjilanit, që në inferioritet numerik u ndëshkua në minutën e 65-të nga Mazure-Hanus.
Sapo nisi koha shtesë, Jarmouni realizoi golin e dytë për miqtë, duke hipotekuar kualifikimin. Asgjë nuk ndryshoi në minutat e mbetura të takimit, pavarësisht tentativave deri në dëshpërim të Gjilanit.
