Korabi mposht Flamurtarin në minutën e 101 dhe siguron finalen e “play off” përballë vendit të tetë në Superiore. Skuadra dibrane triumfoi 2-1 në “Arena e Demave”, sfidë që prodhoi luftë sportive, emocione dhe tension.
Albers Keko ishte heroi i Korabit me dy golat e realizuar në limitet e çdo pjese. 21-vjeçari zhbllokoi takimin në minutën e fundit të fraksionit të parë, por kuqezinjtë nga Vlora barazuan në minutën e 81’. Kondaj kërceu më lart se kundërshtarët dhe në stadium nisi festa vlonjate. Por, Korabi nuk e kishte thënë akoma fjalën e fundit dhe në minutën e 101 gjeti golin e fitores së madhe. Keko realizoi me kokë, gol ku pati jo pak faj portieri i Flamurtarit me daljen e tij të gabuar.
Ky gol solli festë te papërmbajtur te dibranët, që solli një irritim te pamasë të futbollistët vlonjat. Për rrjedhojë në fushë pati përpladje të ashpra mes dy stafeve, gjë që bëri arbitrin Xhaja të nxirrte katër herë kartonin e kuq, 3 prej të cilëve për Flamurtarin. Dy nga këto kartonë të kuq për vlonjatët ishin për futbollistët në fushe, duke e lënë ekipin me 9 lojtarë. Gjithsesi më pas nuk pati më kohë dhe vërshëllima e trefishtë kaloi Korabin më tej, ndërsa Flamurtari edhe sezonin e ardhshëm do jetë në Kategorinë e Parë. Mirëpo me mbarimin e lojës pati shishe në drejtim të arbitrit Juxhin Xhaja, i cili doli nga fusha i shoqëruar nga forca të shumta security.
Festë te Korabi, që do të përballet me Erzenin ose Bylisin, për një biletë në Superiore, në tek takimin play-off. Lot dhe zhgënjim te Flamurtari, që duhet të presë një tjetër sezon për t’u rikthyer në elitën e futbollit shqiptar.
