Një gjykatë në Stamboll ka dënuar një televangjelist, i cili e rrethonte veten me gra gjysmë të zhveshura, të cilat ai i quante “kotele” me 8 658 vjet burg në një rigjykim, njoftuan mediat lokale turke.
Adnan Oktar, i cili është përshkruar si një “udhëheqës kulti”, drejtoi programe televizive i rrethuar nga gra, ndërsa predikonte kreacionizmin dhe vlerat konservatore, shkruan Al Jazeera.
Ai gjithashtu botoi libra në shumë gjuhë anembanë botës, me pseudonimin Harun Yahya.
66-vjeçari dhe qindra ndjekës të tij u arrestuan në vitin 2018 pasi një bastisje e policisë në vilën e tij zbuloi se ai drejtonte një rrjet kriminal nën maskimin e një kulti heterodoks islamik, i cili kryente fushata ndërkombëtare kundër evolucionit përmes shtëpive botuese dhe mediave të ndryshme.
Kanali i tij televiziv online A9 u mbyll gjithashtu.
Në janar të vitit 2021, Oktar u dënua për 10 akuza të veçanta, duke përfshirë drejtimin e një bande kriminale, përfshirje në spiunazh politik dhe ushtarak, abuzim seksual të të miturve, përdhunim, shantazh dhe shkaktim vuajtjesh.
Akuzat përfshijnë gjithashtu ndihmën ndaj rrjetit të udhëhequr nga studiuesi mysliman me bazë në SHBA, Fethullah Gulen, të cilin Turqia e akuzon për organizimin e një përpjekjeje të dështuar për grusht shteti në vitin 2016.
Oktar u dënua në atë kohë me 1 075 vjet, por një Gjykatë e Lartë e rrëzoi atë vendim.
Gjatë rigjykimit, Gjykata e Lartë Penale e Stambollit të mërkurën dënoi Oktarin me 8 658 vjet burg për disa akuza, duke përfshirë abuzimin seksual dhe privimin e lirisë së dikujt, njoftoi agjencia e lajmeve Anadolu.
a.m/dita
