Franca ka shpallur zyrtarisht njohjen e shtetit të Palestinës, duke iu bashkuar një vale vendesh që së fundmi kanë ndërmarrë këtë hap historik.
Presidenti Emmanuel Macron e bëri njoftimin këtë të hënë, më 22 shtator, gjatë një fjalimi në selinë e Kombeve të Bashkuara në Nju Jork, në një konferencë të përbashkët të organizuar nga Franca dhe Arabia Saudite, ku ishin të pranishëm edhe liderë të tjerë botërorë.
Në fjalimin e tij, Macron deklaroi se “nuk mund të presim më” për t’i dhënë fund luftës në Gaza, duke e quajtur situatën aktuale të patolerueshme. Ai kërkoi ndalimin e menjëhershëm të luftimeve dhe lirimin e 48 pengjeve që ende mbahen nga Hamasi.
Duke e cilësuar paqen si një detyrim moral dhe politik, presidenti francez theksoi se krijimi i një shteti palestinez përkrah shtetit të Izraelit është e vetmja rrugë drejt një zgjidhjeje të qëndrueshme.
“Asgjë nuk e justifikon luftën e vazhdueshme,” tha ai, “por gjithçka na detyron ta përfundojmë atë përfundimisht.”
Macron bëri gjithashtu të ditur se Franca është e gatshme të kontribuojë në një mision ndërkombëtar stabilizimi në Gaza, përmes krijimit të një administrate kalimtare që do të përfshijë Autoritetin Palestinez, me detyrën për të çmontuar strukturat e Hamasit dhe për të garantuar një kalim drejt qeverisjes civile dhe paqësore.
Megjithatë, Macron theksoi se Franca do të hapë ambasadën e saj në shtetin e Palestinës vetëm kur të gjitha pengjet të jenë liruar dhe të jetë arritur një armëpushim zyrtar.
Ai vuri në dukje se njohja e të drejtave të palestinezëve nuk përjashton të drejtat e izraelitëve, por përkundrazi, është një hap drejt një paqeje të qëndrueshme dhe të drejtë për të dy popujt.
Në vijim të fjalës së tij, presidenti francez përmendi disa nga vendet që tashmë kanë njohur shtetin e Palestinës, përfshirë: Andorrën, Australinë, Belgjikën, Luksemburgun, Maltën, Monakon, Mbretërinë e Bashkuar, Kanadanë dhe San Marinon. Ai përshëndeti gjithashtu vendimet e fundit të Spanjës, Irlandës, Norvegjisë dhe Suedisë për të ndjekur të njëjtën rrugë, duke i cilësuar këto veprime si zgjedhje të përgjegjshme në favor të paqes.
Vendimi i Francës për të njohur shtetin e Palestinës vjen në një moment kritik për Lindjen e Mesme, ndërsa konflikti mes Izraelit dhe Hamasit ka shkaktuar mijëra viktima dhe është kthyer në një krizë humanitare me pasoja të gjera globale. Me këtë hap, Parisi sinjalizon një angazhim të ri për zgjidhjen politike të konfliktit dhe forcimin e rendit ndërkombëtar të bazuar në të drejtën dhe paqen.
j.l./ dita
