Ministri i Brendshëm, Taulant Balla, njoftoi për goditjen e një grupi kriminal shqiptar, që merrej me trafikun e drogës dhe që përbëhej edhe nga shtetas spanjollë.
Nga foltorja e Kuvendit Balla tha se “operacioni i Europol goditi një grup të madh kriminal që zhvillonte aktivitetin e vet sa në Spanjë dhe në Shqipëri”. Media spanjolle shkruan se dy drejtuesit kryesorë ishin shqiptarë.
Banda kriminale u çmontua nga një operacion i përbashkët me Europol, dhe vuri në pranga 7 persona nga Malaga dhe 20 të tjerë në provincat e Alicante, Barcelona, Madrid, Seville dhe Valencia. Organizata kriminale drejtohej nga dy shtetas shqiptare, e dedikuar për trafikimin e lëndëve narkotike, kryesisht kultivimin dhe mbjelljen e marijuanës në ambiente të mbyllura.
Policia prangosi 27 anëtarët të oganizatës kriminale, konkretisht në provincat e Alicante (1), Barcelona (6), Madrid (7), Málaga (7), Seville (2). dhe Valencia (1). Gjatë kontrollit u sekuestruan 615 mijë euro cash, dhjetë ora luksoze me vlerë mbi 400 mijë euro, dy automjete të nivelit të lartë, makineri numërimi parash, pajisje kompjuterike dhe celularë të koduar.
