“Gruaja priti në një stol para se të shpërthente bombën”, sulm terrorist në Stamboll, vriten 6 persona, plagosen 81

Një shpërthim me bombë në Stamboll ditën e djeshme, në rrugën tregtare Istiklal u mori jetën 6 personave dhe plagosi të paktën 81 të tjerë.

Ministri i Drejtësisë i Turqisë, Bekir Bozdag, ka zbuluar detajet e sulmit në sheshin Taksim dhe sipas tij gjithçka ishte e planifikuar.

Siç shpjegoi ai, gruaja që dyshohet se shpërtheu bombën u ul në një stol, priti 45 minuta para se të ngrihej dhe më pas bomba shpërtheu.

“Një grua ulet në një stol për rreth 45 minuta dhe shpërthimi ndodh menjëherë pasi ajo ngrihet”, tha ministri turk i Drejtësisë, duke u bërë thirrje qytetarëve që të mos mbështeten në lajme provokuese dhe të pavërteta. “Shumë lajme provokuese po qarkullojnë. Është e dobishme për qytetarët që të mos mbështeten në lajme joekzistente që synojnë të mashtrojnë. Prokuroria e Përgjithshme e Stambollit ka nisur një hetim. Autorët e kësaj ngjarje natyrisht janë përgjegjës. Ky është një sulm kundër besueshmërisë, paqes dhe unitetit të Turqisë”, tha ai.

“Ka dy versione. Ose kjo çantë ka një pajisje në të dhe shpërthen vetë ose dikush e shpërthen nga distanca. E gjithë kjo aktualisht është duke u analizuar”, theksoi ministri.

“Kjo është një zonë e zgjedhur posaçërisht. Ka “alienë”, të cilët mund të kenë dashur t’i dërgojnë një mesazh botës. Turqia është një shtet i fuqishëm. Turqia tani është një vend që vazhdon luftën kundër terrorizmit jashtë kufijve të saj. Nuk është e mundur të ndalet përparimi i Turqisë”, shtoi ai duke thënë se “Franca, SHBA dhe Gjermania mbështesin terroristët PKK/YPG. Ata u japin armë. Turqia nuk po lufton vetëm kundër PKK-së, FETO-s dhe DAESH-it, por edhe kundër vendeve që i kanë nisur kundër nesh. Përndryshe, 3-5 terroristë nuk janë problem për ne. Ne nuk duhet të bëjmë dallimin mes terroristëve të huaj dhe atyre vendas”.

Lidhur me shpërthimin, Policia turke ka arrestuar dhjetëra persona. Thuhet se sulmi ka lidhje me Partinë e ndaluar të Punëtorëve Kurdë PKK.

Në kohën e sulmit në këtë shetitore kishte shumë njerëz. Ndonëse e dielë, dyqanet në këtë pjesë të Stambollit janë të hapura.

Partia PKK – Partia e ndaluar e Punëtorëve të Kurdistanit – lufton kundër shtetit turk që nga mesi i viteve 1980. Në të kaluarën, ajo u fajësua vazhdimisht për sulme të përgjakshme. PKK është e klasifikuar edhe si një organizatë terroriste nga shumica e vendeve perëndimore, duke përfshirë SHBA-në dhe Gjermaninë.

j.l./ dita