Mbrojtja e ish-presidentit të Kosovës, Hashim Thaçi, i ka kërkuar Dhomave të Specializuara të Kosovës që ta lirojë atë me kusht, duke ofruar një sërë garancish, përfshirë edhe garanci financiare prej 50 mijë eurosh.
Sipas njoftimit të Gjykatës Speciale, avokatët e Thaçit kanë argumentuar se kushtet e propozuara janë të ngjashme me ato që ishin pranuar për Bashkim Smakajn, Isni Kilajn, Fadil Fazliun dhe Hajredin Kuçin në rastin për “pengim të drejtësisë”, të cilët u liruan me kusht gjatë vitit të kaluar.
Në kërkesën e dorëzuar, mbrojtja garanton se Thaçi nuk do të largohet nga territori i Kosovës dhe se do të dorëzojë pasaportën, si dhe çdo dokument tjetër udhëtimi. Ai do të deklarojë adresën ku do të banojë gjatë gjithë kohës së procedurës dhe nuk do ta ndryshojë vendbanimin pa miratimin paraprak të Zyrës së Prokurorit të Specializuar.
Po ashtu, Thaçi është shprehur i gatshëm të ofrojë një garanci financiare prej 50 mijë eurosh.
Një tjetër zotim është se ai nuk do të ketë asnjë kontakt me të bashkëakuzuarit në rastin për pengim të drejtësisë – Bashkim Smakajn, Isni Kilajn, Fadil Fazliun dhe Hajredin Kuçin – si dhe nuk do të komunikojë me dëshmitarë apo persona të dyshuar në rastet e tjera që po trajton Gjykata Speciale.
Sipas kërkesës, Thaçi nuk do të diskutojë për përmbajtjen e çështjes së tij me askënd, përveç ekipit të mbrojtjes. Ky ndalim do të vlejë edhe për anëtarët e familjes së tij, ndërsa ai do t’u bëjë të ditur të gjithë personave që e kontaktojnë se është i detyruar ta respektojë këtë kufizim të vendosur nga Gjykata.
Mbrojtja ka garantuar gjithashtu se, nëse lirohet me kusht, Thaçi nuk do të bëjë deklarata publike, drejtpërdrejt ose tërthorazi, në media apo në rrjetet sociale lidhur me çështjen.
Ndër kushtet e propozuara është edhe paraqitja javore në Policinë e Kosovës për verifikim, si dhe zotimi se ai do të rikthehet vullnetarisht në paraburgim nëse urdhërohet nga Gjykata dhe do të marrë pjesë në çdo seancë apo procedurë të kërkuar nga Zyra e Prokurorit të Specializuar.
Shum durove