HAWALA, si u transferuan miliona euro nga Zvicra në Tiranë

Përkundrejt një komisioni prej 6%, një grup kriminal ofronte shërbimin e transferimit të parave të drogës nga Zvicra në Shqipëri në bashkëpunim me agjenci shkëmbimi valute dhe agjenci turistike, bëri të ditur SPAK. Çfarë është pastrimi i parave dhe si amnistia mund të ndihmojë trafikantët

Prokuroria e Posaçme Kundër Korrupsionit dhe Krimit të Organizuar arrestoi dy të dyshuar ndërsa një i tretë u arrestua në Zvicër në kuadër të një hetimi mbi një skemë qarkullimi parash të pista të njohur si “Hawala”.

SPAK bëri të ditur në një njoftim për shtyp se grupi i strukturuar kriminal kryente shërbimin e transferimit të parave të fituara nga shitja e drogës në Zvicër dhe në vende të tjera, për në Shqipëri. Komisioni tipik ishte 6% i shumës së transferuar.

Grupi mbante gjendje monetare në Shqipëri në mënyrë që shumat t’i paguheshin porositësit apo bashkëpunëtorëve të tij në Shqipëri menjëherë pas depozitimit të parave në Zvicër.

Agjenci këmbimi valutor dhe agjenci turistike në Tiranë shërbenin si maskë për këtë aktivitet përmes të cilit dyshohet se janë transferuar miliona euro para të drogës.

SPAK iu referua personave të dyshuar me inicialet E.F, B.F dhe P.K. P.K dhe B.F u arrestuan nga policia në Tiranë ndërsa E.F. ndodhet aktualisht i arrestuar në Zvicër.

Hetimet kanë treguar se ky sistem i transferimit të parave është përdorur nga dhjetëra persona. Po ashtu, depozitimet e shumave monetare në Zvicër janë kryer në qindra raste dhe se shumat monetare të transferuara arrijnë në miliona euro.

E.Hoxhaj – Reporter