Policia e Tiranës ka vënë nën hetim edhe 8 persona, të cilët dyshohet se hodhën flakadanë në fushën e stadiumit “Air Albania” më 3 dhjetor, ku u zhvillua derbi i kryeqytetit Tirana-Partizani, që përfundoi me rezultatin 1-1.
Të hënën, u arrestuan 4 persona dhe dy të tjerë u vunë nën hetim.
Dyshohet se shtetasit kanë hedhur flakadanë në fushë dhe që kanë ushtruar veprime të dhunshme.
Ata akuzohen për veprat penale “Prishja e qetësisë publike”, “Goditja e sportistit, trajnerit, arbitrit, ndërmjetësit sportiv” dhe “Veprime të dhunshme në aktivitetet sportive”.
“Në vijim të veprimeve janë referuar materialet në Prokurori dhe ka nisur procedimi në gjendje të lirë për shtetasit R. S., 21 vjeç, E. D., 19 vjeç, G. S., 19 vjeç, L. B., 20 vjeç, E. Q., 19 vjeç, G. H., 35 vjeç, D. I., 36 vjeç dhe A. Sh., 36 vjeç, të gjithë banues në Tiranë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme. Vijojnë veprimet hetimore për dokumentimin e plotë të veprimeve të kundërligjshme të ndodhura gjatë këtij aktivitetit sportiv dhe për identifikimin e shtetasve përgjegjës.
Policia e Tiranës kërkon bashkëpunimin e Federatës, klubeve sportive, tifozërive dhe pavarësisht nga incidentet e ndodhura, është e vendosur të marrë masa dhe të garantojë rendin dhe sigurinë, për çdo aktivitet sportiv, si dhe të ndëshkojë çdo paligjshmëri”, njofton policia.
p.k\dita