Inskenim apo rrëmbim? Mesazhi i fundit me familjen i ish-nëndrejtorit të AKSHI: “Po më arrestojnë…”

Daniel Shima, ish-zëvendësdrejtor i Agjencisë Kombëtare të Shoqërisë së Informacionit (AKSHI), është raportuar si i zhdukur nga familjarët e tij.

Sipas burimeve nga policia, kontaktet me të janë ndërprerë që nga mesdita e sotme, kur ai ka komunikuar për herë të fundit me familjen.

Në mesazhin e fundit, Shima u ka thënë të afërmve: “Po më arrestojnë”.

Pas kësaj, telefoni i tij rezulton i fikur dhe vendndodhja e tij mbetet e panjohur. Familjarët janë interesuar pranë autoriteteve, por kanë mësuar se ai nuk është ndaluar nga policia. Menjëherë pas kësaj, ata kanë bërë një denoncim në Komisariatin nr. 1 në Tiranë për zhdukjen e tij.

Policia ka nisur hetimet dhe po shqyrton dy pista kryesore: mundësinë e një rrëmbimi ose inskenimin e një zhdukjeje.

Për të hedhur dritë mbi rrethanat, janë sekuestruar pamjet e kamerave të sigurisë në zonën ku dyshohet se ndodhej Shima.

Daniel Shima ka mbajtur postin e zëvendësdrejtorit të AKSHI-t deri në vitin 2024 dhe më herët është thirrur nga SPAK për t’u marrë në pyetje në lidhje me tenderat e zhvilluar nga kjo agjenci.

Kjo është një ngjarje alarmante që tejkalon konturet e një rasti të zakonshëm. Kur një ish-zyrtar i lartë i një institucioni strategjik qëndror si AKSHI – që administron sistemet digjitale të qeverisë – zhduket në rrethana misterioze dhe dërgon mesazhe alarmante si “po më arrestojnë”, shteti ka detyrimin jo vetëm të hetojë. Heshtja institucionale është po aq shqetësuese sa vetë rasti.

Në një vend normal, kjo do të ishte kryelajm i ditës, e ndoshta i javës. Jo thjesht për figurën në fjalë, por për atë që nënkupton: një zyrtar që mund të ketë njohuri të thella mbi të dhëna, tendera, siguri informatike, papritur zhduket, dhe asnjë institucion nuk jep sqarim.

Rastet e zhdukjes së zyrtarëve ose personave që kanë pasur lidhje me informacion të ndjeshëm nuk janë të panjohura. Kujtojmë rastin e Xhemail Mustafës në Kosovë apo më herët rastin e Remzi Hoxhës në Shqipëri – të dy të zhdukur në rrethana të dyshimta, të lidhura me pushtetin e kohës.

Në një kohë kur drejtësia e re pretendon të ketë hyrë në fazën e “peshqve të mëdhenj”, zhdukja e një dëshmitari potencial ose individi me njohuri mbi sistemin mund të prodhojë më shumë frikë se besim.

A është Shima viktimë e një presioni politik, i një procesi të korruptuar, apo një akt i inskenuar? Çdo pistë është e vlefshme, por asnjë nuk duhet lënë pa hetuar.

Ky nuk është më vetëm një rast personal, por një çështje e besimit publik ndaj shtetit. Dhe ky besim matet jo vetëm me veprime, por edhe me qartësi dhe transparencë.

Dita