Një ish-drejtor i FBI-së po hetohet nga Shërbimi Sekret pasi dyshohet se ka bërë thirrje për vrasjen e presidentit Trump, sipas Kristi Noem, sekretarja amerikane për sigurinë kombëtare.
James Comey, i cili u shkarkua nga Trump gjatë mandatit të tij të parë, postoi një fotografi në Instagram të disa guaskave që formonin numrat “8647” në një plazh.
Sipas botuesit të fjalorëve Merriam-Webster, “86” do të thotë “ta heqësh” ose “ta eliminosh”, ndërsa Trump është presidenti i 47-të.
Donald Trump Jr ishte ndër figurat konservatore në internet që pretenduan se postimi i Comey-t ishte një thirrje për të vrarë Trumpin. Noem tha se Comey është nën hetim.
“Ish-drejtori i turpëruar i FBI-së James Comey sapo bëri thirrje për vrasjen e @POTUS Trump,” shkroi ajo në X. “DHS dhe Shërbimi Sekret po hetojnë këtë kërcënim dhe do të përgjigjen në mënyrë të përshtatshme.”
Comey, i cili u shkarkua nga Trump në vitin 2017 gjatë një hetimi që përfundimisht dështoi mbi bashkëpunimin e supozuar midis Rusisë dhe fushatës së presidentit, tha se nuk e kishte kuptuar që mesazhi mund të interpretohej si një thirrje për dhunë.
“Postova më herët një fotografi të disa guaskave që pashë sot gjatë një shëtitjeje në plazh, që mendova se ishte një mesazh politik,” tha 64-vjeçari.
“Nuk e kuptova që disa njerëz i lidhin ata numra me dhunën. Nuk më kishte shkuar në mendje, por unë kundërshtoj çdo lloj dhune, kështu që e fshiva postimin.”
Trump, i cili ndodhet në një udhëtim zyrtar në Lindjen e Mesme, i mbijetoi dy tentativave për vrasje gjatë fushatës presidenciale të vitit 2024. Në korrik, në një tubim në Butler, Pennsylvania, një plumb i një atentatori kaloi pranë veshit të tij, duke shmangur kokën për disa milimetra. Sulmuesi, i cili qëlloi nga një çati aty pranë, u vra nga autoritetet.
Në shtator, Ryan Routh u akuzua për tentativë vrasjeje pasi u kap duke qëndruar i armatosur jashtë njërit prej fushave të golfit të Trumpit në Florida.
Postimi i Comey-t shkaktoi zemërim mes mbështetësve të Trumpit, përfshirë djalin e tij, Donald Trump Jr.
Taylor Budowich, zëvendës shefi i stafit të Shtëpisë së Bardhë, tha se postimi në Instagram “po merret seriozisht”.
Ai tha: “Ndërsa Presidenti Trump ndodhet aktualisht në një udhëtim ndërkombëtar në Lindjen e Mesme, ish-drejtori i FBI-së publikon atë që qartazi mund të interpretohet si ‘një goditje’ ndaj presidentit aktual të Shteteve të Bashkuara — një mesazh i shkruar në rërë. Kjo është shqetësuese për të gjithë ne dhe po merret me seriozitet.”
Shkarkimi i Comey-t nga FBI u dramatizua në miniserialin e vitit 2020 “The Comey Rule”, ku ai u interpretua nga aktori Jeff Daniels. Që kur u largua nga FBI, Comey ka shkruar romane thriller.
j.l./ dita
