Një re tymi i dendur ka mbuluar kryeqytetin ukrainas, Kiev, pas një nate të gjatë sulmesh intensive nga Rusia. Sipas autoriteteve ukrainase, më shumë se 550 dronë dhe 11 raketa janë lëshuar mbi qytet, duke shkaktuar dëme të mëdha dhe viktima. Zhurmat e mbrojtjes ajrore dhe shpërthimet e fuqishme shqetësuan qytetarët për më shumë se tetë orë, ndërsa sulmet kanë goditur pothuajse çdo lagje të kryeqytetit.
Sulmet erdhën disa orë pas një telefonate mes presidentit rus Vladimir Putin dhe homologut të tij amerikan Donald Trump, ku Trump shprehu zhgënjimin se Putin nuk ishte gati të përfundonte luftën. Pas këtij diskutimi, sulmet në Kiev intensifikuan.
Një grua humbi jetën në Rusi pas sulmeve me dronë ukrainas, ndërsa në Kiev, të paktën 23 persona u plagosën. Shkatërrimi i infrastrukturës ishte i rëndë, me ndërtesa dhe makinat e djegura në të gjithë qytetin. Autoritetet ukrainase njoftuan se shumë objekte civile, përfshirë infrastruktura hekurudhore, janë dëmtuar gjatë sulmeve.
Ministri i Jashtëm i Ukrainës, Andrii Sybiha, e cilësoi këtë natë si “një nga më të këqijat” që ka përjetuar kryeqyteti, duke shtuar se Rusia duhet të përballet me sanksione më të ashpra pa vonesë. Ai e akuzoi Putinin për një “shpërfillje të hapur” ndaj Shteteve të Bashkuara dhe të gjithë atyre që kërkojnë ndalimin e luftës.
j.l./ dita
