Zbatimi i programit kombëtar të Kontrollit Mjekësor Bazë ka ndihmuar shumë qytetarë që të zbulojnë herët praninë e sëmundjeve kronike, siç është diabeti, hipertensioni, apo edhe patologji të tjera kardiovaskulare.
Janë 1.2 milion qytetarë të grupmoshës 35-70 vjeç që mund të përfitojnë çdo vit nga programi i Kontrollit Mjekësor Bazë, setin e plotë të analizave falas pranë qendrave shëndetësore, dhe nëpërmjet tyre zbulojnë më herët problemet shëndetësore që mund të kenë.
“Ky program ka pasur impakt të qëndrueshëm në rritjen e diagnostikimit të hershëm për sëmundje që konsiderohen të fshehta ,si, diabeti dhe hipertensioni, për të cilat, në vitet e implementimit të këtij programi, ajo çfarë është evidentuar është se, kemi pasur një rritje me 35% të diagnostikimit për sëmundjen e diabetit, përfshirë këtu edhe pre-diabetin dhe gjithashtu 12% më shumë të evidentuar në kohë për sëmundjen që ka lidhje me hipertensionin”, ka bërë me dije ministrja e Shëndetësisë, Ogerta Manastirli gjatë Forumit Shkencor për Programin e Kontrollit Mjekësor Bazë dhe impaktin e tij në parandalimin e sëmundjeve jo të transmetueshme.
Sipas ministres janë të shumta përfitimet që ka sjellë zbatimi i këtij programi.
“Dua të ndalem tek përfitimet e përllogaritura nga ekspertët sa i përket atyre që ne i konsiderojmë vite të shëndetshme të jetës, të cilat përkthehen në fakt në më shumë produktivitet dhe ne duam të shmangim sëmundshmërinë, sepse e dimë që sëmundshmëria në rastet kur agravohet çon në paaftësi, në reduktimin e viteve të shëndetshme të jetës, çon në më pak produktivitet, më pak aktivizim në jetën sociale, familjare, shoqërore, por edhe në më pak kontribut në ekonominë e vendit.
Nëse do të bëhej një përllogartje, ashtu sikurse ekspertët kanë evidentuar, vetëm nga Kontrolli Mjekësor Bazë i kthehet mbrapsh ekonomisë së vendit të paktën 5 milion dollarë në vit, në sajë të një evidentimi të hershëm të problematikave shëndetësore, kostoja e të cilave, nëse nuk evidentohet dhe nëse nuk investohej, do të ishte shumë më e madhe në vitet në vazhdim. Kostot spitalore, kostot e ndërhyrjeve për sëmundje të tilla, janë dhe llogariten shumë herë, shumëfish më të larta se ato në programet e parandalimit”, tha ministrja Manastirliu.
Eksperti i Institutit të Shëndetit Publik, Prof. Alban Ylli, ka nënvizuar gjatë prezantimit të studimit, se, Programi i Kontrollit Mjekësor Bazë, ka kontribuar në rritjen e viteve të jetës dhe uljen e qëndrueshme çdo vit të vdekshmërisë nga hipertensioni, diabeti, goditjet cerebrale dhe sëmundjet ishemike të zemrës.
“Për të gjithë periudhën në studim, janë 5200 vite jete të përfituara, gjysma e të cilave, i dedikohet check-up, pikërisht bazuar në analizën që bëmë, sepse ndërhyrja më e madhe në këtë periudhë ka qenë në kujdesin parësor, nëpërmjet programit të Kontrollit Mjekësor Bazë”, tha prof. Alban Ylli.
Shefi i Shërbimi të Endokrinologjisë në QSUT, Prof. Agron Ylli, ka theksuar se në vitet e fundit, ka një rritje të rasteve të identifikimit të hershëm për të sëmurët me diabet.
“Me anë të Kontrollit Mjekësor Bazë kapëm rreth 4.5% të popullatës që nuk e dinin që kishin diabet dhe po të shohësh shifrat sot, Shqipëria është 10% e popullatës me diabet”,tha Prof. Agron Ylli.
Sipas të dhënave të fundit, Programi i Kontrollit Mjekësor Bazë ka rritur aksesin në shërbime, duke u shtrirë edhe në zonat e thella rurale, ku janë 54% e përfituesve të këtij programi. Nga ky program kombëtar përfiton e gjithë grup mosha nga 35-70 vjeç, që janë afro 1.2 milion qytetarë.
p.k\dita
