Fatmir Meçani nga Libohova ka punuar gjithë jetën si mekanik në ndërmarrjet e kohës.
Dijet nga ky profesion ai i ka përfeksionuar me kohën dhe sot ka shpikur një makineri e cila mbetjet e ullirit i riciklon dhe i përdor për ngrohje përmes djegies.
“Kisha shumë bërsi, se kisha shumë ullinj. U mundova dhe modifikova këtë. Kisha një makinë qepëse që e kisha sjellë nga Greqia dhe një pulexho të lavatriçes, megjithë suportin me kuzhineta. E modifikova me një tubo nga këto transmisioni të makinave dhe e realizova, dhe më dha shumë rezultat. Kjo, që ta shfrytëzosh gjithë kapacitetin e kësaj, duhen tre veta”, thotë mekaniku Fatmir Meçani.
Me modesti, Fatmiri nuk e cilëson shpikje këtë makineri për përpunimin e mbetjeve të ullirit. Tashmë përdorimi për ngrohje i ullinjve të ricikluar ka tërhequr interes jo vetëm në zonën e Libohovës, por edhe më gjerë.
“Të gjithë shumë të habitur kanë ngelur dhe vijnë, i marrin, mbaj sasinë që më duhet për vete, ndërsa të tjerët e shes tepricën. Nuk ia plotësoj dot dëshirën, sepse sasia është e limituar. S’ja realizoj dot të gjithëve. Vijnë dhe marrin ata që e marrin. I kam klientë të përhershëm tani, ja ruaj atë pjesën,” thotë mekaniku Fatmir Meçani.
“Nuk shkon një gram dëm. Çfarë ngelet nga vaji, e gjitha bëhet bërsi për djegie. Briketa nuk shkojnë dëm, asgjë, sepse më përpara e hidhja edhe për pleh, por nuk ia vlen,” thotë ai.
Për mekanikun 70-vjeçar, ulliri është pemë e shenjtë, pasi mund të përdoret për konsum, prodhimin e vajit dhe tashmë falë makinerisë së shpikur prej tij, edhe për ngrohje.
“Ulliri është mbreti i pemëve. Ulliri është vlerësuar që në kohë të lashta, jo sot. Nuk diskutohet, pemë shekullore që jeton gjatë. Ulliri është ta krahasosh me floririn. E ha vaj, e ha të kripur, plus që edhe mbetjet nuk shkojnë dëm,” thotë ai.
Tashmë, në zonën e Gjirokastrës, po vjen në rritje numri i kultivuesve të pemës së ullirit, duke krijuar një traditë të veçantë
