Qeveria britanike pritet të njohë sot, 21 shtator, shtetin e Palestinës, duke shënuar një nga kthesat më të mëdha të politikës së jashtme të Londrës në dekada.
Vendimi vjen pas muajsh debatesh të brendshme dhe presioni të fortë politik, si nga deputetët laburistë ashtu edhe nga komunitetet me ndikim të drejtpërdrejtë nga lufta në Gaza.
Kryeministri Keir Starmer e kishte paralajmëruar këtë hap që në korrik, duke e kushtëzuar me një armëpushim dhe angazhim për një zgjidhje me dy shtete. Por, teksa këto kushte nuk u përmbushën, Downing Street zgjodhi të përmbushë premtimin historik të laburistëve dhe ta shpallë vendimin sot, në prag të Asamblesë së Përgjithshme të OKB-së.
Britania bëhet kështu një nga fuqitë e mëdha të para të G7-ës që njeh shtetin palestinez, pas Francës, Australisë dhe Kanadasë. Zyrtarë të Foreign Office kanë theksuar se njohja nuk është thjesht simbolike, por synon të japë një impuls real në terren dhe të nxisë arabët të kërkojnë çarmatosjen e Hamasit.
Megjithatë, vendimi ka ndezur edhe kritika të forta.
Kryeministri izraelit Benjamin Netanyahu e quajti “shpërblim për terrorizmin e Hamasit”, ndërsa presidenti amerikan Donald Trump deklaroi hapur se ka “mospajtime të thella” me Starmer për këtë çështje.
Në politikën e brendshme, lëvizja shihet si një përpjekje për të shuar zemërimin e elektoratit laburist mbi qëndrimet e mëparshme të partisë për Gazën.
Më shumë se gjysma e deputetëve socialistë kishin firmosur një letër për njohjen e menjëhershme të Palestinës, ndërsa disa ministra e shihnin si të domosdoshme për të ruajtur mbështetjen në zonat me universitete apo komunitete myslimane.
Kritikët brenda vetë laburistëve paralajmërojnë se njohja ishte “karta e fundit diplomatike” e Britanisë dhe se mund të largojë edhe më shumë Izraelin nga procesi i paqes.
Ndërkohë, të tjerë e përshëndesin si një hap të vonuar, por të domosdoshëm: Më mirë tani se kurrë!
j.l./ dita
Ti i di me mire punet e tua zonja Britani.por Hamasi edhe ato 10 pengje te mbetur ka vendosur ti vrase.