Një telefon celular është kapur sot në burgun e Drenovës, i cili ka qenë në përdorim të Laert Haxhiut, i dënuar për disa ngjarje të rënda kriminale, përfshirë masakrën e Lushnjes. Telefoni është gjetur në sektorin ku Haxhiu po vuan dënimin dhe, sipas hetimeve paraprake, dyshohet se është përdorur për të komunikuar jashtë burgut, duke mundësuar aktivitete kriminale. Ky incident ka ngritur dyshime për një rrjet të mundshëm të paligjshëm të komunikimit brenda mureve të burgut.
Ky nuk është rasti i parë që Laert Haxhiu është lidhur me telefona celularë të kapur në burg. Në korrik të këtij viti, një tjetër telefon ishte gjetur në një sektor tjetër të burgut, duke shkaktuar një krizë të brendshme në sistemin e burgjeve. Si pasojë, Drejtoria e Përgjithshme e Burgjeve mori masa drastike, duke shkarkuar drejtuesin e IEVP-së, Fatjon Fasho, dhe shefin e sektorit, Sokol Kacoli. Kjo ngjarje kishte nxitur hetime të thelluara mbi mënyrën si i dënuarit po përdornin pajisje të ndaluara brenda institucioneve.
Laert Haxhiu, i dënuar me burg përjetë për masakrën e Lushnjes, është akuzuar për një mori veprash kriminale, që përfshijnë vrasje, atentate dhe grup kriminal. Dëshmia e të penduarit të drejtësisë, Marjus Tafani, ka kontribuar në zbardhjen e shumë ngjarjeve kriminale që Haxhiu ka kryer. Pas arrestimit të tij në Greqi dhe ekstradimit në Shqipëri, hetimet për aktivitetet e tij të jashtme dhe ndikimin që ka brenda burgjeve, janë bërë më të ngushta.
j.l./ dita
Keshtu eshte kur marin me qafe njerezit e mire e verteta del heret apo vone