Kundërofensiva ukrainase vijon në shkallë të gjerë duke shfrytëzuar resurse strategjike, por deri më tani nuk ka shënuar asnjë sukses. Kështu pretendon presidenti rus Vladimir Putin i cili në një takim me blogerët ushtarakë të transmetuar në televizion, deklaroi se humbjet e forcave ukrainase janë gati katastrofike.
“Përveç humbjeve në personel që po i afrohen pragut të katastrofës, ata kanë humbur edhe 25-30 përqind të armatimeve të siguruara nga perëndimi gjatë kundërofensivës. Gjatë kësaj kohe kanë humbur 160tanke dhe 360 automjete të blinduara”, u shpreh Putin.
Teksa theksoi nevojën për të luftuar ato që i quajti agjentë armiq, dhe për të përmirësuar mbrojtjen kundërsulmeve në thellësi të territorit rus, Putin tha se nuk do të ndiqte shembullin e Ukrainës duke shpallur ligjin e luftës. po ashtu, sipas tij, nuk është e nevojshme as mobilizim i rezervistëve shtesë pas atyre të thirrur në shtator.
Megjithatë kjo sipas tij do të varet nga objektivët që do të vendosë Moska në Ukrainë, duke sugjeruar se një përpjekje e re për të pushtuar Kievin do të kërkonte forca shtesë.
“Çështja e mobilizimit varet nga qëllimet që Iivendosim vetes. Për momentin nuk e kemi të nevojshme”, theksoi Putin.
Numri një i Kremlinit akuzoi Ukrainën se kishte shkatërruar digën e Kakovkës duke bombarduar strukturën me sistemet raketore të prodhuara në Amerikë, HIMARS. Ai e drejtoi edhe një herë gishtin nga perëndimi për furnizimet me armë drejt Ukrainës, ndërsa bëri të ditur se Moska po e pasuronte arsenalin ushtarak duke rritur prodhimin me 2.7 herë.
“Jam i gatshëm për bisedime me Kievin tha ai”, por furnizimet me armë duhet të ndalen.
