Një ngjarje me fund të lumtur dhe me protagonistë ndershmërinë e njerëzve ka ndodhur këto ditë në Sardenjë të Italisë.
Pasditen e 1 gushtit, Nicola Paderi, një 21-vjeçar nga Sanluri (Medio Campidano), humbi kuletën e tij teksa udhëtonte me tren nga Olbia në San Gavino Monreale. Përveç dokumenteve të rëndësishme, në kuletë gjendeshin edhe të gjitha bakshishet e tij javore nga puna sezonale — një shumë jo e vogël parash.
Apeli i së ëmës në Facebook
Në pamundësi për të bërë diçka tjetër, e ëma e të riut, Marina Ruggeri, vendosi të publikonte një apel në profilin e saj në Facebook (pasi djali nuk kishte një llogari personale):
“Marrë parasysh se dokumentet mund të ribëhen dhe denoncimi është kryer, po shpresojmë që përmes shpërndarjeve të mbërrijmë më shpejt te rezultati. Nuk kemi shpresë t’i gjejmë paratë, edhe pse njerëz të ndershëm ekzistojnë ende… Njoftimin po e bëj unë sepse im bir nuk ka profil në Facebook.”
Me qindra përdorues iu përgjigjën thirrjes duke e shpërndarë mesazhin. Dhe mrekullia nuk vonoi: pas më pak se dy ditësh, kuleta u gjet dhe u rikthye plotësisht e paprekur, bashkë me të gjitha paratë brenda.
”Nuk kisha asnjë shpresë për paratë”
I riu nuk e fshehu habitjen e tij për ngjarjen: ”Prisja të gjendeshin dokumentet, kisha shpresë për to, por për paratë nuk kisha absolutisht asnjë shpresë,” u shpreh Nicola Paderi për mediat italiane (Tgcom24).
Nga ana tjetër, e ëma përditësoi postimin e saj me falënderime të përzemërta, duke shkruar: “Kuleta është plotësisht e paprekur, përfshirë të gjitha paratë. Ky është fuqia e shpërndarjes dhe e përdorimit të mirë të rrjeteve sociale. Unë besoj te qeniet njerëzore.”
Një rast që përsëritet
Interesant është fakti se kjo nuk është hera e parë që familja përjeton një ngjarje të tillë. Në vitin 2024, vetë Marina Ruggeri kishte humbur një çantë dore me para në rrugët e Pavias, dhe i ishte kthyer përsëri e paprekur me të gjitha gjërat brenda.
Një tjetër histori që vërteton se ndershmëria dhe mirësia ekzistojnë ende!
Kot po them une, meqe qenka rasti i dyte po me keta njerez mos valle nuk e humbin po bejne sikur e humbin dhe pastaj fap, e gjejne prape. Shife kur ta humbi portofolin per here te trete motra e ketij. Vetem po ta kishte gjetur Sala ose Edvini portofoli do te ishte kthyer. te vetmit njerez te mire dhe te ndershem qe kane mbetur ne kete bote, perveç Trumpit, Putinit dhe atij kinezit, se Bin Ladeni nuk eshte gjalle, kuptohet.
Ec e humbe ne Fier.