Delegacionet ruse dhe ukrainase do të takohen përsëri sot, të hënën, më 2 qershor, në Stamboll për bisedime që synojnë arritjen e paqes në luftën që shpërtheu pas pushtimit rus të Ukrainës në shkurt të vitit 2022. Moska dhe Kievi zhvilluan bisedimet e tyre të para të drejtpërdrejta që nga viti 2022 më 16 maj në Stamboll, por këto bisedime nuk dhanë fryt, pasi të dy vendet thjesht u zotuan për një shkëmbim të të burgosurve në shkallë të gjerë.
Takimi i ri vjen pas njërit prej sulmeve më të suksesshme ukrainase në territorin rus, i cili goditi objektiva deri në Siberi. Sulmi i koordinuar me dron ukrainas shënjestroi katër aeroporte ushtarake ruse dhe shkatërroi dhjetëra avionë, përfshirë bombardues strategjikë, sipas Shërbimit të Sigurisë Ukrainase (SBU).
Raundi i ri i bisedimeve pritet të fillojë sot në orën 13:00 në Pallatin Ciragan, një pallat osman në brigjet e Bosforit i cili tani funksionon si hotel luksoz. Ndërkohë, Ministri i Jashtëm rus Sergei Lavrov zhvilloi dje një bisedë telefonike me homologun e tij amerikan Marco Rubio lidhur me bisedimet e ardhshme.
Moska ka njoftuar se në bisedimet e sotme do të paraqesë një “memorandum” me kushtet e saj për arritjen e paqes, të cilin nuk pranoi t’ia jepte Ukrainës paraprakisht, siç kërkoi Kievi. Të dyja palët janë larg një marrëveshjeje, qoftë një armëpushim apo një zgjidhje afatgjatë e konfliktit. Prioritetet e Ukrainës janë “një armëpushim i plotë dhe pa kushte” dhe “kthimi i të burgosurve” dhe fëmijëve për të cilët Kievi akuzon Moskën se i ka rrëmbyer, tha dje në rrjetet sociale presidenti ukrainas Volodymyr Zelenskyy.
j.l./ dita
